ਸੱਤਾ ਨੂੰ ਵੰਗਾਰ: ਅਮਰੀਕਾ ‘ਚ ਲੱਖਾਂ ਲੋਕ ਸੜਕਾਂ `ਤੇ ਉੱਤਰੇ

‘ਨੋ ਕਿੰਗਜ਼’ ਨਾਅਰਿਆਂ ਨਾਲ ਦੇਸ਼ ਭਰ ਵਿੱਚ ਵਿਰੋਧ ਪ੍ਰਦਰਸ਼ਨ
ਪੰਜਾਬੀ ਪਰਵਾਜ਼ ਬਿਊਰੋ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਿਰੋਧ ਵਿੱਚ ਅਮਰੀਕਾ ਵਿੱਚ ਵੱਡਾ ਵਿਰੋਧ ਪ੍ਰਦਰਸ਼ਨ ਹੋਇਆ ਹੈ। ਸ਼ਨੀਵਾਰ ਨੂੰ ਲੱਖਾਂ ਅਮਰੀਕੀ ਸੜਕਾਂ `ਤੇ ਉਤਰ ਆਏ ਅਤੇ ‘ਨੋ ਕਿੰਗਜ਼’ ਨਾਅਰਿਆਂ ਨਾਲ ਮਾਰਚ ਕੀਤਾ। ਟਰੰਪ ਦੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਇਹ ਤੀਜਾ ਵੱਡਾ ਪ੍ਰਦਰਸ਼ਨ ਹੈ। ਵੱਖ-ਵੱਖ ਸਰੋਤਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ 18 ਅਕਤੂਬਰ ਨੂੰ ਹੋਏ ਇਸ ‘ਨੋ ਕਿੰਗਜ਼ ਡੇਅ’ ਵਿੱਚ 70 ਲੱਖ ਤੋਂ ਵੱਧ ਲੋਕਾਂ ਨੇ ਹਿੱਸਾ ਲਿਆ, ਜੋ ਅਮਰੀਕਾ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਵਿਰੋਧ ਪ੍ਰਦਰਸ਼ਨ ਹੈ।

ਇਹ ਪ੍ਰਦਰਸ਼ਨ ਸਿਰਫ਼ ਅਮਰੀਕਾ ਤੱਕ ਹੀ ਸੀਮਤ ਨਹੀਂ ਰਿਹਾ, ਬਲਕਿ ਕੈਨੇਡਾ, ਯੂਰਪ ਅਤੇ ਦੁਨੀਆ ਭਰ ਦੇ ਸ਼ਹਿਰਾਂ ਵਿੱਚ ਵੀ ਇਸ ਦੀ ਗੂੰਜ ਸੁਣਾਈ ਦਿੱਤੀ। ਪ੍ਰਦਰਸ਼ਕਾਰੀਆਂ ਨੇ ਟਰੰਪ ਦੀ ਅਗਵਾਈ ਵਿੱਚ ਅਮਰੀਕਾ ਦੇ ਤੇਜ਼ੀ ਨਾਲ ਤਾਨਾਸ਼ਾਹੀ ਵੱਲ ਵਧਣ ਦੀ ਨਿੰਦਾ ਕੀਤੀ। ਨਵੇਂ ਤੱਥਾਂ ਅਨੁਸਾਰ ਅਮਰੀਕਾ ਦੇ ਸਾਰੇ 50 ਰਾਜਾਂ ਵਿੱਚ 2700 ਤੋਂ ਵੱਧ ਸਥਾਨਾਂ `ਤੇ ਇਹ ਵਿਰੋਧ ਪ੍ਰਦਰਸ਼ਨ ਹੋਏ, ਜਿਨ੍ਹਾਂ ਵਿੱਚ ਵਾਸ਼ਿੰਗਟਨ ਡੀ.ਸੀ., ਨਿਊ ਯਾਰਕ, ਸ਼ਿਕਾਗੋ ਅਤੇ ਲਾਸ ਏਂਜਲਸ ਵਰਗੇ ਵੱਡੇ ਸ਼ਹਿਰਾਂ ਤੋਂ ਲੈ ਕੇ ਛੋਟੇ ਸ਼ਹਿਰਾਂ ਤੱਕ ਸ਼ਾਮਲ ਹਨ।
ਵੱਖ-ਵੱਖ ਸ਼ਹਿਰਾਂ ਵਿੱਚ ਪ੍ਰਦਰਸ਼ਕਾਰੀਆਂ ਨੇ ‘ਨੋ ਕਿੰਗਜ਼’ (ਹੁਣ ਕੋਈ ਰਾਜਾ ਨਹੀਂ) ਨਾਅਰੇ ਲਗਾਏ ਅਤੇ ਮਾਰਚ ਕੀਤੇ।
ਨਿਊ ਯਾਰਕ ਦੇ ਟਾਈਮਜ਼ ਸਕੁਏਅਰ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਇਕੱਠੇ ਹੋਏ, ਜਿਨ੍ਹਾਂ ਨੇ ਹੱਥਾਂ ਵਿੱਚ ਨਾਅਰਿਆਂ ਨਾਲ ਲਿਖੇ ਬੈਨਰ ਫੜੇ ਹੋਏ ਸਨ। ਉੱਧਰ ਬੋਸਟਨ, ਅਟਲਾਂਟਾ ਅਤੇ ਸ਼ਿਕਾਗੋ ਵਿੱਚ ਹਜ਼ਾਰਾਂ ਲੋਕਾਂ ਨੇ ਰੈਲੀਆਂ ਕੀਤੀਆਂ। ਪ੍ਰਦਰਸ਼ਕਾਰੀਆਂ ਨੇ ਵਾਸ਼ਿੰਗਟਨ ਤੇ ਲਾਸ ਏਂਜਲਸ ਵਿੱਚ ਮਾਰਚ ਕੀਤਾ ਅਤੇ ਕਈ ਰਿਪਬਲਿਕਨ ਨੇਤਾ ਵਾਲੇ ਰਾਜਾਂ ਵਿੱਚ ਰਾਜਧਾਨੀਆਂ ਦੇ ਬਾਹਰ ਜਨਤਕ ਸਥਾਨਾਂ `ਤੇ ਧਰਨੇ ਦਿੱਤੇ। ਇਹ ਪ੍ਰਦਰਸ਼ਨ ਜੂਨ 2025 ਵਿੱਚ ਹੋਏ ਪਹਿਲੇ ‘ਨੋ ਕਿੰਗਜ਼’ ਦੀ ਯਾਦ ਤਾਜ਼ਾ ਕਰਵਾ ਗਿਆ, ਜਿਸ ਵਿੱਚ ਵੀ ਲੱਖਾਂ ਲੋਕਾਂ ਨੇ ਹਿੱਸਾ ਲਿਆ ਸੀ।

‘ਅਮਰੀਕਾ ਨੂੰ ਨਫ਼ਰਤ ਕਰਨ ਵਾਲੀਆਂ ਰੈਲੀਆਂ’
ਟਰੰਪ ਦੀ ਰਿਪਬਲਿਕਨ ਪਾਰਟੀ ਨੇ ਇਨ੍ਹਾਂ ਪ੍ਰਦਰਸ਼ਨਾਂ ਨੂੰ ਅਮਰੀਕਾ ਨੂੰ ਨਫ਼ਰਤ ਕਰਨ ਵਾਲੀਆਂ ਰੈਲੀਆਂ ਕਿਹਾ ਹੈ। ਟਰੰਪ ਦੇ ਇਸ ਸਾਲ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਤੋਂ ਇਹ ਤੀਜਾ ਵੱਡਾ ਸਾਂਝਾ ਪ੍ਰਦਰਸ਼ਨ ਸੀ। ਇਹ ਅਜਿਹੇ ਸਮੇਂ ਵਿੱਚ ਹੋਇਆ ਹੈ, ਜਦੋਂ ਅਮਰੀਕਾ ਸਰਕਾਰੀ ਸ਼ੱਟਡਾਊਨ ਦਾ ਸਾਹਮਣਾ ਕਰ ਰਿਹਾ ਹੈ। ਇਸੇ ਲਈ ਨਿਰਾਸ਼ ਲੋਕ ਟਰੰਪ ਪ੍ਰਸ਼ਾਸਨ ਦੀਆਂ ਕਈ ਖਾਸ ਨੀਤੀਆਂ ਅਤੇ ਕੰਮਾਂ ਦਾ ਵੀ ਵਿਰੋਧ ਕਰ ਰਹੇ ਹਨ, ਜਿਨ੍ਹਾਂ ਵਿੱਚ ਅਮਰੀਕੀ ਸ਼ਹਿਰਾਂ ਵਿੱਚ ਫੈਡਰਲ ਫੌਜਾਂ/ਨੈਸ਼ਨਲ ਗਾਰਡ ਸਿਪਾਹੀਆਂ ਨੂੰ ਤਾਇਨਾਤ ਕਰਨਾ ਵੀ ਸ਼ਾਮਲ ਹੈ। ਅੰਦੋਲਨਕਾਰੀ ਇਸ ਨੂੰ ਫੈਡਰਲ ਅਧਿਕਾਰਾਂ ਦੀ ਉਲੰਘਣਾ ਅਤੇ ਫੌਜੀਕਰਨ ਕਹਿ ਰਹੇ ਹਨ। ਖ਼ਬਰਾਂ ਮੁਤਾਬਕ ਕੁਝ ਪ੍ਰਦਰਸ਼ਨ ਅਮਰੀਕਾ ਤੋਂ ਬਾਹਰ ਵੀ ਹੋਏ ਹਨ, ਜਿਵੇਂ ਕਿ ਲੰਡਨ ਅਤੇ ਟੋਰਾਂਟੋ ਵਿੱਚ ਸੈਂਕੜੇ ਲੋਕਾਂ ਨੇ ਇਸੇ ਤਰ੍ਹਾਂ ਦੀ ਨਾਅਰੇਬਾਜ਼ੀ ਕੀਤੀ। ਇਸ ਨਾਲ ਅੰਤਰਰਾਸ਼ਟਰੀ ਪੱਧਰ `ਤੇ ਟਰੰਪ ਦੀਆਂ ਨੀਤੀਆਂ `ਤੇ ਚਰਚਾ ਵਧ ਗਈ ਹੈ।

ਟਰੰਪ ਨੇ ਕਿਹਾ- ਮੈਂ ਰਾਜਾ ਨਹੀਂ
ਇਸੇ ਦੌਰਾਨ ਰਾਸ਼ਟਰਪਤੀ ਟਰੰਪ ਨੇ ਇਸ ਇਲਜ਼ਾਮ ਨੂੰ ਖਾਰਜ ਕਰ ਦਿੱਤਾ ਹੈ ਕਿ ਉਹ ਕਿਸੇ ਰਾਜੇ ਵਾਂਗ ਕੰਮ ਕਰ ਰਹੇ ਹਨ। ਇੱਕ ਇੰਟਰਵਿਊ ਵਿੱਚ ਪ੍ਰਦਰਸ਼ਨ ਉੱਤੇ ਪ੍ਰਤੀਕਿਰਿਆ ਦਿੰਦਿਆਂ ਉਨ੍ਹਾਂ ਕਿਹਾ, “ਮੈਂ ਰਾਜੇ ਵਾਂਗ ਮਹਿਸੂਸ ਨਹੀਂ ਕਰਦਾ। ਮੈਨੂੰ ਕਿਸੇ ਵੀ ਚੀਜ਼ ਨੂੰ ਮਨਜ਼ੂਰੀ ਦਿਵਾਉਣ ਲਈ ਨਰਕ ਵਰਗੀਆਂ ਹਾਲਤਾਂ ਵਿੱਚੋਂ ਗੁਜ਼ਰਨਾ ਪੈਂਦਾ ਹੈ।” ਉਨ੍ਹਾਂ ਨੇ ਰਾਸ਼ਟਰਪਤੀ ਦੇ ਅਹੁਦੇ ਨੂੰ ਡੀਪ ਸਟੇਟ, ਡੈਮੋਕਰੈਟਸ ਨਾਲ ਭਰਪੂਰ ਨੌਕਰਸ਼ਾਹੀ ਅਤੇ ਇੱਕ ਕੱਟੜ ਖੱਬੇ ਪੱਖੀ ਵਿਰੋਧ ਨਾਲ ਜੁੜਿਆ ਮੁਸ਼ਕਲ ਕੰਮ ਦੱਸਿਆ, ਜਿਸ ਨੇ ਜ਼ਿਆਦਾਤਰ ਗੋਰੇ ਅਮਰੀਕੀਆਂ ਦੀ ਅਸਾਧਾਰਨਤਾ ਨੂੰ ਘਟਾ ਦਿੱਤਾ ਹੈ। ਟਰੰਪ ਨੇ ਆਪਣੇ ਸਮਰਥਕਾਂ ਨੂੰ ਕਿਹਾ ਕਿ ਇਹ ਪ੍ਰਦਰਸ਼ਨ ਬਿਲੀਅਨਰਾਂ ਵੱਲੋਂ ਫੰਡ ਕੀਤੇ ਜਾਂਦੇ ਹਨ, ਜਿਵੇਂ ਕਿ ਇੱਕ ਵਾਇਰਲ ਚਾਰਟ ਵਿੱਚ ਦੱਸਿਆ ਗਿਆ ਹੈ ਕਿ ਡੈਮੋਕਰੈਟਿਕ ਪਾਰਟੀ ਨੇ ਇਸ ਲਈ 295 ਮਿਲੀਅਨ ਡਾਲਰ ਖਰਚ ਕੀਤੇ। ਪਰ ਆਯੋਜਕਾਂ ਨੇ ਇਸ ਇਲਜ਼ਾਮ ਨੂੰ ਰੱਦ ਕਰਦਿਆਂ ਕਿਹਾ ਕਿ ਇਹ ਆਮ ਅਮਰੀਕੀਆਂ ਦਾ ਅੰਦੋਲਨ ਹੈ।

ਟਰੰਪ ਸਮਰਥਕਾਂ ਦੇ ਨਿਸ਼ਾਨੇ `ਤੇ ਪ੍ਰਦਰਸ਼ਨ
ਟਰੰਪ ਦੇ ਨੁਮਾਇੰਦਿਆਂ ਨੇ ਇਸ ਨੂੰ ਕੱਟੜ ਖੱਬੇ ਪੱਖੀ ਪ੍ਰਦਰਸ਼ਕਾਰੀਆਂ ਵੱਲੋਂ ਅਮਰੀਕਾ ਨੂੰ ਨਫ਼ਰਤ ਕਰਨ ਵਾਲੀਆਂ ਰੈਲੀਆਂ ਕਿਹਾ ਹੈ, ਜਿਨ੍ਹਾਂ ਨੂੰ ਉਹ ਐਂਟੀਫਾ ਕਹਿੰਦੇ ਹਨ। ਫੌਕਸ ਨਿਊਜ਼ ਨਾਲ ਵ੍ਹਾਈਟ ਹਾਊਸ ਦੀ ਤਰਜਮਾਨ ਕੈਰੋਲਿਨ ਲੈਵਿਟ ਨੇ ਕਿਹਾ ਕਿ ਇਹ ਰੈਲੀਆਂ ਡੈਮੋਕਰੈਟਿਕ ਪਾਰਟੀ ਵੱਲੋਂ ਆਯੋਜਿਤ ਅਤੇ ਸਮਰਥਿਤ ਹਨ। ਲੈਵਿਟ ਨੇ ਇਲਜ਼ਾਮ ਲਗਾਇਆ ਕਿ ਇਸ ਦਾ ਮੁੱਖ ਵੋਟਰ ਵਰਗ ਹਮਾਸ ਅਤਿਵਾਦੀਆਂ, ਨਾਜਾਇਜ਼ ਵਿਦੇਸ਼ੀਆਂ ਅਤੇ ਹਿੰਸਕ ਅਪਰਾਧੀਆਂ ਨਾਲ ਬਣਿਆ ਹੈ। ਹਾਲਾਂਕਿ, ਵੇਖਣ ਵਿੱਚ ਰੈਲੀਆਂ ਕੁਝ ਹੋਰ ਹੀ ਸਨ, ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਗੋਰੇ ਅਮਰੀਕੀ ਮੂਲ ਦੇ ਲੋਕ ਸਨ।
ਵਿਰੋਧ ਪ੍ਰਦਰਸ਼ਨਾਂ ਦੌਰਾਨ ਸੱਜੇ ਪੱਖੀ ਭੜਕਾਊ ਤੱਤਾਂ ਦੀ ਘੁਸਪੈਠ ਦੇ ਡਰ ਨਾਲ ਕਈ ਥਾਵਾਂ `ਤੇ ਰੈਲੀ ਪ੍ਰਬੰਧਕਾਂ ਨੇ ਪ੍ਰਦਰਸ਼ਨਕਾਰੀਆਂ ਨੂੰ ਸ਼ਾਂਤੀ ਬਣਾਈ ਰੱਖਣ ਅਤੇ ਆਪਣੀਆਂ ਚਿੰਤਾਵਾਂ ਨੂੰ ਨਿੱਜੀ ਤਰੀਕੇ ਨਾਲ ਪ੍ਰਗਟ ਕਰਨ ਦੀ ਅਪੀਲ ਕੀਤੀ। ਇਸ ਨਾਲ ਹੀ ਫਲਿਸਤੀਨੀ ਝੰਡੇ, ਯੂਕਰੇਨ ਦੇ ਸਮਰਥਨ ਵਰਗੇ ਬੈਨਰ ਨਾ ਲਿਆਉਣ ਅਤੇ ਕੋਈ ਵੀ ਹਥਿਆਰ ਨਾ ਲੈ ਜਾਣ ਦੀ ਅਪੀਲ ਕੀਤੀ। ਪ੍ਰਦਰਸ਼ਨਾਂ ਵਿੱਚ ਬਲੂਅਪ ਕੌਸਟਿਊਮਾਂ ਅਤੇ ਸਟ੍ਰੀਟ ਪਾਰਟੀ ਵਾਇਬ ਸੀ, ਜੋ ਸ਼ਾਂਤੀਪੂਰਨ ਮਾਹੌਲ ਨੂੰ ਵਧਾਉਂਦਾ ਸੀ। ਐੱਨ.ਪੀ.ਆਰ. ਅਨੁਸਾਰ ਇਨ੍ਹਾਂ ਪ੍ਰਦਰਸ਼ਨਾਂ ਨੇ ਟਰੰਪ ਦੀਆਂ ਨੀਤੀਆਂ ਵਿਰੁੱਧ ਤਿੰਨ ਮੁੱਖ ਬਿੰਦੂ ਉਜਾਗਰ ਕੀਤੇ: ਤਾਨਾਸ਼ਾਹੀ ਵੱਲ ਵਧਦਾ ਮੁਲਕ, ਫੈਡਰਲ ਤਾਕਤਾਂ ਦੀ ਗਲਤ ਵਰਤੋਂ ਅਤੇ ਅਰਥਵਿਵਸਥਾ `ਤੇ ਮਾੜਾ ਅਸਰ।
ਸੋ; ਇਹ ਪ੍ਰਦਰਸ਼ਨ ਅਮਰੀਕਾ ਦੀ ਡੈਮੋਕਰੇਸੀ ਲਈ ਮਹੱਤਵਪੂਰਨ ਪਲ ਸਾਬਤ ਹੋ ਰਹੇ ਹਨ। ਬਰਨੀ ਸੈਂਡਰਜ਼ ਵਰਗੇ ਨੇਤਾਵਾਂ ਨੇ ਇਸ ਨੂੰ ਅਮੀਰ ਲੋਕਾਂ ਵੱਲੋਂ ਅਰਥਵਿਵਸਥਾ ਅਤੇ ਰਾਜਨੀਤੀ ਨੂੰ ਹਾਈਜੈਕ ਕਰਨ ਵਿਰੁੱਧ ਲੜਾਈ ਕਿਹਾ ਹੈ। ਗੈਵਿਨ ਨਿਊਸਮ ਨੇ ਕਿਹਾ, “70 ਲੱਖ ਅਮਰੀਕੀਆਂ ਨੇ ਸ਼ਾਂਤੀਪੂਰਨ ਤਰੀਕੇ ਨਾਲ ਰਾਜਸ਼ਾਹੀ ਵਿਰੁੱਧ ਪ੍ਰਦਰਸ਼ਨ ਕੀਤੇ, ਇਹ ਅਸਲ ਵਿਰੋਧੀ ਭਾਵਨਾ ਹੈ।” ਪਰ ਟਰੰਪ ਸਮਰਥਕਾਂ ਨੇ ਇਸ ਨੂੰ ਡੈਮੋਕਰੈਟਿਕ ਪਾਰਟੀ ਦੀ ਸਾਜ਼ਿਸ਼ ਕਿਹਾ, ਜਿਸ ਵਿੱਚ ਬਿਲੀਅਨਰਾਂ ਨੇ ਪੈਸੇ ਲਗਾਏ। ਇੱਕ ਐਕਸ ਪੋਸਟ ਵਿੱਚ ਕਿਹਾ ਗਿਆ ਕਿ ਇਹ ਪ੍ਰਦਰਸ਼ਨ ਵੀਅਤਨਾਮ ਜੰਗ ਵਾਲੇ ਸਮੇਂ ਵਾਂਗ ਨਹੀਂ, ਬਲਕਿ ਗੁਮਰਾਹ ਲੋਕਾਂ ਦਾ ਇਕੱਠ ਹੈ। ਹਾਲਾਂਕਿ, ਆਯੋਜਕ ਨੋਕਨਿਗਸ।ੋਰਗ ਨੇ ਦੱਸਿਆ ਕਿ ਇਹ ਪ੍ਰਦਰਸ਼ਨ ਅਮਰੀਕਾ ਵਿੱਚ ਕੋਈ ਰਾਜਾ ਨਹੀਂ ਹੈ ਅਤੇ ਸੰਵਿਧਾਨਕ ਅਧਿਕਾਰਾਂ ਦੀ ਰਾਖੀ ਦਾ ਸੰਕਲਪ ਹੈ। ਇਹ ਅੰਦੋਲਨ ਅੱਗੇ ਵੀ ਜਾਰੀ ਰਹਿਣ ਦੀ ਉਮੀਦ ਹੈ, ਜੋ ਅਮਰੀਕੀ ਰਾਜਨੀਤੀ ਨੂੰ ਨਵਾਂ ਮੋੜ ਦੇ ਸਕਦਾ ਹੈ।