ਅਮਰੀਕੀ ਯੂਨੀਵਰਸਿਟੀਆਂ ਦੀ ਨੀਂਹ ਹਿੱਲੀ

*ਭਾਰਤੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਆਈ ਇਤਿਹਾਸਕ ਗਿਰਾਵਟ
ਪੰਜਾਬੀ ਪਰਵਾਜ਼ ਬਿਊਰੋ
ਅਮਰੀਕਾ ਵਿੱਚ ਭਾਰਤੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਆਈ ਇਤਿਹਾਸਕ ਗਿਰਾਵਟ ਨੇ ਇਹ ਸਾਫ਼ ਕਰ ਦਿੱਤਾ ਹੈ ਕਿ ਦੁਨੀਆਂ ਦੀ ਸਭ ਤੋਂ ਵੱਡੀ ਸਿੱਖਿਆ ਵਾਲੀ ਅਰਥਵਿਵਸਥਾ ਹੁਣ ਆਪਣੇ ਪੁਰਾਣੇ ਭਰੋਸੇ ਨੂੰ ਗੁਆ ਰਹੀ ਹੈ। ਵੀਜ਼ਾ ਪ੍ਰਕਿਰਿਆ ਦੀ ਵਧਦੀ ਜਟਿਲਤਾ, ਸਖ਼ਤ ਸੁਰੱਖਿਆ ਜਾਂਚ ਅਤੇ ਐੱਚ-1ਬੀ ਵਰਕ ਪਰਮਿਟ ਦੀ ਗ਼ੈਰ-ਯਕੀਨੀ ਨੇ ਭਾਰਤੀ ਪਰਿਵਾਰਾਂ ਨੂੰ ਡੂੰਘੀ ਫ਼ਿਕਰਮੰਦੀ ਵਿੱਚ ਪਾ ਦਿੱਤਾ ਹੈ। ਇਸ ਦਾ ਸਿੱਧਾ ਅਸਰ ਇਹ ਹੋਇਆ ਹੈ ਕਿ ਭਾਰਤੀ ਵਿਦਿਆਰਥੀ ਹੁਣ ਵੱਡੀ ਗਿਣਤੀ ਵਿੱਚ ਅਮਰੀਕਾ ਤੋਂ ਮੂੰਹ ਮੋੜ ਕੇ ਕੈਨੇਡਾ, ਬ੍ਰਿਟੇਨ, ਆਸਟ੍ਰੇਲੀਆ ਅਤੇ ਯੂਰਪ ਵੱਲ ਰੁਖ ਕਰ ਰਹੇ ਹਨ।

ਇੰਸਟੀਚਿਊਟ ਫਾਰ ਇੰਟਰਨੈਸ਼ਨਲ ਐਜੂਕੇਸ਼ਨ (ਆਈ.ਆਈ.ਈ.) ਦੀ ਪ੍ਰਾਇਮਰੀ ਓਪਨ ਡੋਰਜ਼ ਰਿਪੋਰਟ 2025 ਅਤੇ ਅਮਰੀਕੀ ਯੂਨੀਵਰਸਿਟੀਆਂ ਦੇ ਅੰਦਰੂਨੀ ਸਰਵੇ ਨੇ ਦੱਸਿਆ ਹੈ ਕਿ 2024-25 ਸੈਸ਼ਨ ਤੱਕ ਅਮਰੀਕਾ ਵਿੱਚ ਭਾਰਤੀ ਵਿਦਿਆਰਥੀਆਂ ਦੀ ਆਮਦ ਲਗਭਗ 44 ਫੀਸਦੀ ਘਟ ਗਈ ਹੈ। ਪਿਛਲੇ ਸਾਲ ਜਿੱਥੇ ਲਗਭਗ 3,31,602 ਭਾਰਤੀ ਵਿਦਿਆਰਥੀ ਇੱਥੇ ਪੜ੍ਹ ਰਹੇ ਸਨ, ਉੱਥੇ ਇਸ ਸਾਲ ਇਹ ਗਿਣਤੀ ਘਟ ਕੇ ਲਗਭਗ 1,85,000 ਤੱਕ ਆ ਗਈ ਹੈ। ਪਿਛਲੇ 15 ਸਾਲਾਂ ਵਿੱਚ ਇਹ ਸਭ ਤੋਂ ਤੇਜ਼ ਗਿਰਾਵਟ ਹੈ, ਜਿਸ ਨੇ ਅਮਰੀਕੀ ਕੈਂਪਸਾਂ ਦੀ ਆਰਥਿਕ ਨੀਂਹ ਨੂੰ ਹਿਲਾ ਦਿੱਤਾ ਹੈ। ਆਈ.ਆਈ.ਈ. ਦੀ ਰਿਪੋਰਟ ਅਨੁਸਾਰ ਨਵੇਂ ਵਿਦੇਸ਼ੀ ਵਿਦਿਆਰਥੀਆਂ ਦੀ ਰਜਿਸ਼ਟਰੇਸ਼ਨ 2025 ਦੇ ਪਤਝੜ ਵਿੱਚ 17 ਫੀਸਦੀ ਘਟੀ ਹੈ, ਜੋ ਪੈਂਡੈਮਿਕ ਤੋਂ ਬਾਅਦ ਸਭ ਤੋਂ ਵੱਡੀ ਗਿਰਾਵਟ ਹੈ। ਭਾਰਤੀ ਵਿਦਿਆਰਥੀਆਂ ਵਿੱਚ ਇਹ ਗਿਰਾਵਟ ਹੋਰ ਡੂੰਘੀ ਹੈ; ਜੁਲਾਈ-ਅਗਸਤ 2025 ਵਿੱਚ ਆਉਣ ਵਾਲੇ ਨਵੇਂ ਵਿਦਿਆਰਥੀਆਂ ਵਿੱਚ 50 ਫੀਸਦੀ ਕਮੀ ਹੋਈ ਹੈ। ਇਹ ਗਿਰਾਵਟ ਸਿਰਫ਼ ਰਜਿਸ਼ਟਰੇਸ਼ਨ ਤੱਕ ਹੀ ਸੀਮਿਤ ਨਹੀਂ, ਬਲਕਿ ਅਮਰੀਕੀ ਯੂਨੀਵਰਸਿਟੀਆਂ ਨੂੰ ਹਰ ਸਾਲ ਅਰਬਾਂ ਡਾਲਰਾਂ ਦੀ ਆਮਦਨੀ ਵੀ ਘਟਾ ਰਹੀ ਹੈ। ਨੈਫਸਾ (ਐਸੋਸੀਏਸ਼ਨ ਆਫ਼ ਇੰਟਰਨੈਸ਼ਨਲ ਐਜੂਕੇਟਰਜ਼) ਦੇ ਅਨੁਮਾਨ ਅਨੁਸਾਰ ਜੇਕਰ ਇਹ ਗਿਰਾਵਟ 15 ਫੀਸਦੀ ਵੀ ਰਹੀ ਤਾਂ ਅਮਰੀਕਾ ਨੂੰ 7 ਅਰਬ ਡਾਲਰਾਂ ਦੀ ਆਮਦਨੀ ਦਾ ਨੁਕਸਾਨ ਹੋਵੇਗਾ ਅਤੇ 60,000 ਨੌਕਰੀਆਂ ਖਤਮ ਹੋ ਜਾਣਗੀਆਂ।

ਵੀਜ਼ਾ ਨੀਤੀਆਂ ਨੇ ਵਧਾਈਆਂ ਮੁਸ਼ਕਲਾਂ
ਆਈ.ਆਈ.ਈ. ਅਨੁਸਾਰ ਵੀਜ਼ਾ ਸਲਾਟਾਂ ਦੀ ਕਮੀ, ਇੰਟਰਵਿਊ ਦੀ ਲੰਮੀ ਉਡੀਕ ਅਤੇ ਛੋਟੀ ਜਿਹੀ ਦਸਤਾਵੇਜ਼ੀ ਗਲਤੀ ’ਤੇ ਵੀ ਤੁਰੰਤ ਰਿਜੈਕਸ਼ਨ ਭਾਰਤੀ ਵਿਦਿਆਰਥੀਆਂ ਲਈ ਸਭ ਤੋਂ ਵੱਡੀ ਚੁਣੌਤੀ ਬਣ ਗਏ ਹਨ। ਸੁਰੱਖਿਆ ਜਾਂਚ ਇੰਨੀ ਸਖ਼ਤ ਹੋ ਗਈ ਹੈ ਕਿ ਕਈ ਵਿਦਿਆਰਥੀਆਂ ਨੂੰ ਦੋ-ਦੋ ਵਾਰ ਇੰਟਰਵਿਊ ਦੇਣੇ ਪੈ ਰਹੇ ਹਨ। ਐੱਚ-1ਬੀ ਵਰਕ ਪਰਮਿਟ ਦੀ ਲਾਟਰੀ ਪ੍ਰਣਾਲੀ ਨੇ ਵੀ ਪਰਿਵਾਰਾਂ ਦਾ ਭਰੋਸਾ ਘਟਾ ਦਿੱਤਾ ਹੈ।
ਐੱਮ.ਆਈ.ਟੀ. ਅਤੇ ਕਾਰਨੇਗੀ ਮੈਲਨ ਵਰਗੀਆਂ ਟਾਪ ਇੰਸਟੀਚਿਊਟਾਂ ਵਿੱਚ ਭਾਰਤੀ ਵਿਦਿਆਰਥੀਆਂ ਦੀ ਮੌਜੂਦਗੀ ਵਿੱਚ 60-70 ਫੀਸਦੀ ਤੱਕ ਗਿਰਾਵਟ ਰਿਕਾਰਡ ਕੀਤੀ ਗਈ ਹੈ। 2025 ਵਿੱਚ ਅਮਰੀਕੀ ਵੀਜ਼ਾ ਅਫਸਰਾਂ ਨੇ ਭਾਰਤੀ ਵਿਦਿਆਰਥੀਆਂ ਦੇ 25 ਫੀਸਦੀ ਤੋਂ ਵੱਧ ਐਫ-1 ਵੀਜ਼ਾ ਅਪਲਾਈ ਕੇਸਾਂ ਨੂੰ ਰਿਜੈਕਟ ਕੀਤਾ ਹੈ, ਜੋ ਪਿਛਲੇ ਸਾਲਾਂ ਨਾਲੋਂ 10 ਫੀਸਦੀ ਵੱਧ ਹੈ। ਇਸ ਤੋਂ ਇਲਾਵਾ ਟਰੰਪ ਪ੍ਰਸ਼ਾਸਨ ਦੀਆਂ ਨਵੀਆਂ ਇਮੀਗ੍ਰੇਸ਼ਨ ਪਾਲਿਸੀਆਂ ਨੇ ਵੀਜ਼ਾ ਪ੍ਰਕਿਰਿਆ ਨੂੰ ਹੋਰ ਵੀ ਸਖ਼ਤ ਕਰ ਦਿੱਤਾ ਹੈ, ਜਿਸ ਕਾਰਨ ਵਿਦਿਆਰਥੀਆਂ ਨੂੰ ਘੱਟੋ-ਘੱਟ 6 ਮਹੀਨੇ ਉਡੀਕ ਕਰਨੀ ਪੈ ਰਹੀ ਹੈ। ਇਹ ਸਭ ਨਾ ਸਿਰਫ਼ ਵਿਦਿਆਰਥੀਆਂ ਨੂੰ ਪ੍ਰਭਾਵਿਤ ਕਰ ਰਿਹਾ ਹੈ, ਸਗੋਂ ਅਮਰੀਕੀ ਯੂਨੀਵਰਸਿਟੀਆਂ ਨੂੰ ਵੀ, ਜਿਥੇ ਭਾਰਤੀ ਵਿਦਿਆਰਥੀ ਐੱਸ.ਟੀ.ਈ.ਐੱਮ. (ਸਾਇੰਸ, ਟੈਕਨਾਲੌਜੀ, ਇੰਜੀਨੀਅਰਿੰਗ ਅਤੇ ਮੈਥੇਮੈਟਿਕਸ) ਕੋਰਸਾਂ ਵਿੱਚ 40 ਫੀਸਦੀ ਤੋਂ ਵੱਧ ਹਿੱਸਾ ਰੱਖਦੇ ਹਨ। ਇੱਕ ਅਧਿਐਨ ਅਨੁਸਾਰ ਭਾਰਤੀ ਵਿਦਿਆਰਥੀਆਂ ਦੀ ਗਿਰਾਵਟ ਨੇ ਅਮਰੀਕੀ ਐੱਸ.ਟੀ.ਈ.ਐੱਮ. ਫੀਲਡਾਂ ਵਿੱਚ 15 ਫੀਸਦੀ ਘੱਟ ਰਿਸਰਚ ਯੋਗਦਾਨ ਦਿੱਤਾ ਹੈ।

ਹੋਰ ਦੇਸ਼ਾਂ ਵੱਲ ਤੇਜ਼ੀ ਨਾਲ ਵੱਧ ਰਿਹੈ ਝੁਕਾਅ
ਸਟੂਡੈਂਟ ਵੀਜ਼ਾ ਮਾਨੀਟਰਿੰਗ ਨੈੱਟਵਰਕ (ਐੱਸ.ਵੀ.ਐੱਮ.ਐੱਨ.) ਅਨੁਸਾਰ ਹੁਣ ਭਾਰਤੀ ਵਿਦਿਆਰਥੀਆਂ ਲਈ ਅਮਰੀਕਾ ਪਹਿਲੀ ਪਸੰਦ ਨਹੀਂ ਰਿਹਾ। ਕੈਨੇਡਾ ਵਿੱਚ ਭਾਰਤੀ ਅਰਜ਼ੀਆਂ 38 ਫੀਸਦੀ ਵਧੀਆਂ ਹਨ, ਜਿੱਥੇ 2025 ਵਿੱਚ ਲਗਭਗ 4,27,000 ਭਾਰਤੀ ਵਿਦਿਆਰਥੀ ਪੜ੍ਹ ਰਹੇ ਹਨ। ਬ੍ਰਿਟੇਨ ਵਿੱਚ 24 ਫੀਸਦੀ ਵਾਧਾ ਹੋਇਆ ਹੈ, ਜਿੱਥੇ ਕਿਊਆਰ-2 2025 ਵਿੱਚ 15,000 ਤੋਂ ਵੱਧ ਭਾਰਤੀ ਵਿਦਿਆਰਥੀਆਂ ਨੂੰ ਵੀਜ਼ਾ ਮਿਲੇ ਹਨ– ਇਹ 44 ਫੀਸਦੀ ਵਾਧਾ ਹੈ। ਆਸਟ੍ਰੇਲੀਆ ਵਿੱਚ 19 ਫੀਸਦੀ ਅਤੇ ਯੂਰਪੀਅਨ ਯੂਨੀਅਨ ਵਿੱਚ 17 ਫੀਸਦੀ ਵਾਧਾ ਹੋਇਆ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਖਿੱਚ ਨਾਲੋਂ ਸੁਰੱਖਿਆ ਅਤੇ ਸਥਿਰਤਾ ਦੀ ਖੋਜ ਹੈ। ਹੋਰ ਦੇਸ਼ ਪੜ੍ਹਾਈ ਤੋਂ ਬਾਅਦ ਨੌਕਰੀ ਅਤੇ ਪੀ.ਆਰ. (ਪਰਮਾਨੈਂਟ ਰੈਜ਼ੀਡੈਂਸੀ) ਦਾ ਸਪੱਸ਼ਟ ਰਾਹ ਦਿੰਦੇ ਹਨ, ਜਦਕਿ ਅਮਰੀਕਾ ਵਿੱਚ ਇਹ ਗਲੈਮਰ ਯਕੀਨੀ ਹੈ।
ਸਾਲ 2025 ਵਿੱਚ ਕੁੱਲ ਭਾਰਤੀ ਵਿਦਿਆਰਥੀਆਂ ਦੀ ਗਿਣਤੀ ਵਿਦੇਸ਼ਾਂ ਵਿੱਚ 18 ਲੱਖ ਤੱਕ ਪਹੁੰਚ ਗਈ ਹੈ, ਜੋ ਪਿਛਲੇ ਸਾਲ ਨਾਲੋਂ 12 ਫੀਸਦੀ ਵੱਧ ਹੈ। ਕੈਨੇਡਾ ਵਿੱਚ ਹਾਲਾਂਕਿ ਆਮ ਵਿਦੇਸ਼ੀ ਵਿਦਿਆਰਥੀਆਂ ਦੀ ਆਮਦ 60 ਫੀਸਦੀ ਘਟੀ ਹੈ, ਪਰ ਭਾਰਤੀਆਂ ਲਈ ਇਹ ਅਜੇ ਵੀ ਪਹਿਲੀ ਪਸੰਦ ਹੈ। ਬ੍ਰਿਟੇਨ ਵਿੱਚ ਨਵੀਆਂ ਵੀਜ਼ਾ ਅਰਜ਼ੀਆਂ ਵਿੱਚ 29 ਫੀਸਦੀ ਵਾਧਾ ਹੋਇਆ ਹੈ, ਜੋ ਦਰਸਾਉਂਦਾ ਹੈ ਕਿ ਭਾਰਤੀ ਪਰਿਵਾਰ ਹੁਣ ਯੂਰਪੀਅਨ ਯੂਨੀਵਰਸਿਟੀਆਂ ਵੱਲ ਵੀ ਵਧੇਰੇ ਧਿਆਨ ਦੇ ਰਹੇ ਹਨ। ਆਸਟ੍ਰੇਲੀਆ ਨੇ 2025 ਲਈ ਨਵੇਂ ਵਿਦਿਆਰਥੀਆਂ ਦੀ ਗਿਣਤੀ ਨੂੰ 2,70,000 ਤੱਕ ਸੀਮਿਤ ਕੀਤਾ ਹੈ, ਪਰ ਭਾਰਤੀ ਅਰਜ਼ੀਆਂ ਵਿੱਚ 20 ਫੀਸਦੀ ਵਾਧਾ ਹੋਇਆ ਹੈ। ਇਹ ਬਦਲਾਅ ਨਾ ਸਿਰਫ਼ ਸਿੱਖਿਆ ਦੇ ਰੁਝਾਨਾਂ ਨੂੰ ਬਦਲ ਰਿਹਾ ਹੈ, ਸਗੋਂ ਵਿਸ਼ਵ ਪੱਧਰੀ ਟੈਲੈਂਟ ਪੂਲ ਨੂੰ ਵੀ ਪ੍ਰਭਾਵਿਤ ਕਰ ਰਿਹਾ ਹੈ।

ਭਾਰਤੀ ਪਰਿਵਾਰਾਂ ਦੀ ਮਾਨਸਿਕਤਾ ਵਿੱਚ ਵੱਡਾ ਬਦਲਾਅ
ਭਾਰਤ ਵਿੱਚ ਲੰਮੇ ਸਮੇਂ ਤੱਕ ਅਮਰੀਕਾ ਨੂੰ ਸਿੱਖਿਆ ਅਤੇ ਕਰੀਅਰ ਦਾ ਸਰਵਉੱਚ ਕੇਂਦਰ ਮੰਨਿਆ ਜਾਂਦਾ ਸੀ, ਪਰ ਹੁਣ ਮੌਜੂਦਾ ਹਾਲਾਤ ਨੇ ਇਹ ਤਸਵੀਰ ਬਦਲ ਦਿੱਤੀ ਹੈ। ਵਿਦੇਸ਼ ਅਧਿਐਨ ਨਾਲ ਜੁੜੇ ਇੰਸਟੀਚਿਊਟਾਂ ਦੇ ਸਰਵੇ ਦੱਸਦੇ ਹਨ ਕਿ ਇੱਕ ਸਾਲ ਪਹਿਲਾਂ ਤੱਕ 61 ਫੀਸਦੀ ਭਾਰਤੀ ਵਿਦਿਆਰਥੀ ਅਮਰੀਕਾ ਨੂੰ ਤਰਜੀਹ ਦਿੰਦੇ ਸਨ, ਜਦਕਿ ਹੁਣ ਇਹ ਅੰਕੜਾ ਘਟ ਕੇ 22 ਫੀਸਦੀ ਤੱਕ ਆ ਗਿਆ ਹੈ। ਮਹਿੰਗੀ ਪੜ੍ਹਾਈ, ਅਸੁਰੱਖਿਆ ਅਤੇ ਭਵਿੱਖ ਦੀ ਅਨਿਸ਼ਚਿਤਤਾ ਨੇ ਪਰਿਵਾਰਾਂ ਨੂੰ ਘੱਟ ਜੋਖਮ ਵਾਲੇ ਰਸਤਿਆਂ ਵੱਲ ਧੱਕ ਦਿੱਤਾ ਹੈ। ਇੱਕ ਸਰਵੇ ਅਨੁਸਾਰ 2025 ਵਿੱਚ 45 ਫੀਸਦੀ ਭਾਰਤੀ ਪਰਿਵਾਰਾਂ ਨੇ ਕਿਹਾ ਕਿ ਉਹ ਹੁਣ ਕੈਨੇਡਾ ਜਾਂ ਬ੍ਰਿਟੇਨ ਵਰਗੇ ਦੇਸ਼ਾਂ ਨੂੰ ਚੁਣਨਗੇ, ਕਿਉਂਕਿ ਉੱਥੇ ਪੜ੍ਹਾਈ ਤੋਂ ਬਾਅਦ ਨੌਕਰੀ ਅਤੇ ਨਾਗਰਿਕਤਾ ਦਾ ਰਾਹ ਵਧੇਰੇ ਸੌਖਾ ਹੈ। ਇਸ ਤੋਂ ਪਹਿਲਾਂ 2010 ਵਿੱਚ ਸਿਰਫ਼ 1 ਲੱਖ ਭਾਰਤੀ ਵਿਦਿਆਰਥੀ ਵਿਦੇਸ਼ ਪੜ੍ਹਨ ਜਾਂਦੇ ਸਨ, ਪਰ ਹੁਣ ਇਹ ਗਿਣਤੀ 18 ਲੱਖ ਤੱਕ ਪਹੁੰਚ ਗਈ ਹੈ– ਇਹ ਵਾਧਾ ਭਾਰਤ ਦੀ ਵਧਦੀ ਆਰਥਿਕ ਤਾਕਤ ਅਤੇ ਮੱਧ ਵਰਗ ਦੇ ਵਿਸਥਾਰ ਨਾਲ ਜੁੜਿਆ ਹੈ। ਪਰ ਅਮਰੀਕੀ ਵੀਜ਼ਾ ਨੀਤੀਆਂ ਨੇ ਇਸ ਨੂੰ ਰੋਕਿਆ ਹੈ, ਜਿਸ ਕਾਰਨ ਭਾਰਤੀ ਨੌਜਵਾਨ ਹੁਣ ਘਰੇਲੂ ਸਿੱਖਿਆ ਜਾਂ ਹੋਰ ਦੇਸ਼ਾਂ ਵੱਲ ਵੀ ਵੇਖ ਰਹੇ ਹਨ। ਉਦਾਹਰਣ ਵਜੋਂ ਭਾਰਤ ਵਿੱਚ ਆਈ.ਆਈ.ਟੀਜ਼ ਅਤੇ ਆਈ.ਆਈ.ਐੱਮ. ਵਰਗੀਆਂ ਇੰਸਟੀਚਿਊਟਾਂ ਵਿੱਚ ਨਾਮਜ਼ਦਗੀ 20 ਫੀਸਦੀ ਵਧੀ ਹੈ, ਜੋ ਦਰਸਾਉਂਦੀ ਹੈ ਕਿ ਵਿਦੇਸ਼ ਜਾਣ ਦੀ ਭੁੱਖ ਘਟ ਰਹੀ ਹੈ।
ਭਾਰਤੀ ਵਿਦਿਆਰਥੀਆਂ ਦੀ ਇੰਨੀ ਤੇਜ਼ ਘਾਟ ਅਮਰੀਕੀ ਯੂਨੀਵਰਸਿਟੀਆਂ ਲਈ ਸਿਰਫ਼ ਆਮਦਨੀ ਦਾ ਨਹੀਂ, ਸਗੋਂ ਵਿਸ਼ਵ ਪੱਧਰੀ ਟੈਲੈਂਟ ਦੇ ਨੁਕਸਾਨ ਦਾ ਵੀ ਵੱਡਾ ਝਟਕਾ ਹੈ। ਭਾਰਤੀ ਵਿਦਿਆਰਥੀ ਹਰ ਸਾਲ ਅਰਬਾਂ ਡਾਲਰਾਂ ਦੀ ਫੀਸ ਅਤੇ ਰਿਸਰਚ ਯੋਗਦਾਨ ਨਾਲ ਅਮਰੀਕੀ ਸਿੱਖਿਆ ਪ੍ਰਣਾਲੀ ਨੂੰ ਮਜ਼ਬੂਤ ਬਣਾਉਂਦੇ ਰਹੇ ਹਨ। 2024 ਵਿੱਚ ਭਾਰਤੀ ਵਿਦਿਆਰਥੀਆਂ ਨੇ ਅਮਰੀਕੀ ਅਰਥਵਿਵਸਥਾ ਵਿੱਚ 45 ਅਰਬ ਡਾਲਰਾਂ ਦਾ ਯੋਗਦਾਨ ਪਾਇਆ ਸੀ, ਜਿਸ ਵਿੱਚ ਫੀਸ ਤੋਂ ਇਲਾਵਾ ਰਹਿਣ-ਸਹਿਣ ਅਤੇ ਖਰੀਦੋ-ਫਰੋਖਤ ਵੀ ਸ਼ਾਮਲ ਹੈ। ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਜੇਕਰ ਅਮਰੀਕਾ ਨੇ ਵੀਜ਼ਾ ਅਤੇ ਵਰਕ ਪਰਮਿਟ ਨਿਯਮਾਂ ਵਿੱਚ ਸੁਧਾਰ ਨਹੀਂ ਕੀਤੇ ਤਾਂ ਦੁਨੀਆਂ ਦਾ ਟੈਲੈਂਟ ਅਮਰੀਕਾ ਤੋਂ ਹਟ ਕੇ ਹੋਰ ਦੇਸ਼ਾਂ ਵੱਲ ਸਥਾਈ ਤੌਰ ’ਤੇ ਜਾ ਸਕਦਾ ਹੈ।
ਇੱਕ ਰਿਪੋਰਟ ਅਨੁਸਾਰ ਇਹ ਗਿਰਾਵਟ ਅਮਰੀਕੀ ਯੂਨੀਵਰਸਿਟੀਆਂ ਨੂੰ 2026 ਤੱਕ 10 ਅਰਬ ਡਾਲਰ ਦਾ ਵਧੇਰੇ ਨੁਕਸਾਨ ਪਹੁੰਚਾ ਸਕਦੀ ਹੈ, ਖਾਸ ਕਰ ਕੇ ਗ੍ਰੈਜੂਏਟ ਪ੍ਰੋਗਰਾਮਾਂ ਵਿੱਚ, ਜਿੱਥੇ ਭਾਰਤੀ ਵਿਦਿਆਰਥੀ ਵੱਧ ਖਰਚ ਕਰਦੇ ਹਨ। ਨਾਲ ਹੀ, ਇਹ ਗਿਰਾਵਟ ਅਮਰੀਕੀ ਇਨੋਵੇਸ਼ਨ ਨੂੰ ਵੀ ਪ੍ਰਭਾਵਿਤ ਕਰੇਗੀ, ਕਿਉਂਕਿ ਭਾਰਤੀ ਵਿਦਿਆਰਥੀ ਅਮਰੀਕੀ ਕੰਪਨੀਆਂ ਵਿੱਚ 25 ਫੀਸਦੀ ਵਿਗਿਆਨੀ ਅਤੇ ਇੰਜੀਨੀਅਰ ਹਨ। ਭਵਿੱਖ ਵਿੱਚ ਜੇਕਰ ਇਹ ਰੁਝਾਨ ਜਾਰੀ ਰਿਹਾ ਤਾਂ ਅਮਰੀਕਾ ਨੂੰ ਆਪਣੀ ਵਿਸ਼ਵ ਅਗਵਾਈ ਵਾਲੀ ਸਥਿਤੀ ਗੁਆਉਣੀ ਪੈ ਸਕਦੀ ਹੈ, ਜਦਕਿ ਕੈਨੇਡਾ ਅਤੇ ਬ੍ਰਿਟੇਨ ਵਰਗੇ ਦੇਸ਼ ਆਪਣੀ ਸਿੱਖਿਆ ਅਰਥਵਿਵਸਥਾ ਨੂੰ ਮਜਬੂਤ ਕਰਨਗੇ। ਇਸ ਲਈ ਅਮਰੀਕੀ ਸਰਕਾਰ ਨੂੰ ਜਲਦੀ ਕਾਰਵਾਈ ਕਰਨੀ ਚਾਹੀਦੀ ਹੈ ਤਾਂ ਜੋ ਭਾਰਤੀ ਟੈਲੈਂਟ ਨੂੰ ਵਾਪਸ ਖਿੱਚਿਆ ਜਾ ਸਕੇ।