ਸੁਰਖੀਆਂ ਵਿੱਚ ਰਹੀ ਪੰਜਾਬ ਦੀ ਸਿਆਸਤ

2025 ਵਿੱਚੋਂ ਗੁਜ਼ਰਦਿਆਂ…
*ਕਈ ਨੌਕਰਸ਼ਾਹਾਂ ਨੂੰ ਲੱਗਾ ਸੇਕ; ਵਿਵਾਦਾਂ ਵਿੱਚ ਫਸੇ ਕਈ ਲੀਡਰ
ਮੋਹਿਤ ਧੁੱਪੜ
ਸਾਲ 2025 ਵਿੱਚ ਪੰਜਾਬ ਦਾ ਸਿਆਸੀ ਮਾਹੌਲ ਕਾਫ਼ੀ ਉਤਰਾਅ-ਚੜ੍ਹਾਅ ਵਾਲਾ ਰਿਹਾ। ਵਿਧਾਨ ਸਭਾ ਦੀਆਂ ਦੋ ਉਪ-ਚੋਣਾਂ ਹੋਈਆਂ ਅਤੇ ਸਾਲ ਦੇ ਅੰਤ ਵਿੱਚ ਅੱਠ ਸਾਲਾਂ ਤੋਂ ਲਟਕੀਆਂ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਪੰਚਾਇਤੀ ਚੋਣਾਂ ਵੀ ਕਰਵਾਈਆਂ ਗਈਆਂ। ਆਮ ਆਦਮੀ ਪਾਰਟੀ (ਆਪ) ਦਾ ਦਬਦਬਾ ਰਿਹਾ ਅਤੇ ਬਾਕੀ ਧਿਰਾਂ ਚਿੰਤਨ-ਮੰਥਨ ਵਿੱਚ ਲੱਗੀਆਂ ਰਹੀਆਂ। ਇਸ ਸਾਲ ਪੰਜਾਬ ਨੇ ਸਿਆਸੀ ਉਥਲ-ਪਥਲ ਦੇ ਨਵੇਂ ਰੰਗ ਵੇਖੇ। ਨੇਤਾਵਾਂ ਨਾਲ ਵਿਵਾਦ ਜੁੜੇ ਤਾਂ ਇਸ ਲਪੇਟ ਵਿੱਚ ਨੌਕਰਸ਼ਾਹ ਵੀ ਆ ਗਏ।

ਇੱਕ ਆਈ.ਪੀ.ਐੱਸ. ਅਫਸਰ ਨੂੰ ਮੁਅੱਤਲੀ ਝੱਲਣੀ ਪਈ, ਦੂਜੇ ਨੂੰ ਜ਼ਬਰਦਸਤੀ ਛੁੱਟੀ ’ਤੇ ਭੇਜਿਆ ਗਿਆ। ਪੰਜਾਬ ਪੁਲਿਸ ਦੇ ਇੱਕ ਅਫਸਰ ਨੂੰ ਭਾਰਤੀ ਚੋਣ ਕਮਿਸ਼ਨ ਸਾਹਮਣੇ ਪੇਸ਼ ਹੋਣਾ ਪਿਆ। ਪੰਜਾਬ ਦੀ ਇੱਕ ਵੱਡੀ ਸਿਆਸੀ ਪਾਰਟੀ ਟੁੱਟ ਗਈ ਤੇ ਇੱਕ ਵਿਧਾਇਕ ਪੁਲਿਸ ਕਾਰਵਾਈ ਤੋਂ ਬਚਣ ਲਈ ਵਿਦੇਸ਼ ਭੱਜ ਗਿਆ। ਇੱਕ ਵਿਧਾਇਕ ਨੂੰ ਸਜ਼ਾ ਵੀ ਹੋਈ। ਇਸ ਸਾਲ ਸਿਆਸੀ ਹਲਚਲ ਹੋਰ ਤੇਜ਼ ਹੋਵੇਗੀ, ਕਿਉਂਕਿ ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ।
ਸ਼੍ਰੋਮਣੀ ਅਕਾਲੀ ਦਲ ਦੋਫਾੜ
ਪੰਜਾਬ ਦੀ ਸਭ ਤੋਂ ਪੁਰਾਣੀ ਖੇਤਰੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਨੂੰ ਅਗਸਤ ਵਿੱਚ ਤਿੱਖੀ ਫੁਟ ਦਾ ਸਾਹਮਣਾ ਕਰਨਾ ਪਿਆ, ਇਹ ਇਸ ਸਾਲ ਸੂਬੇ ਵਿੱਚ ਸਭ ਤੋਂ ਵੱਡੀ ਸਿਆਸੀ ਹਲਚਲ ਸੀ। ਪੰਜਾਬ ਦੀ ਪੰਥਕ ਸਿਆਸਤ ਵਿੱਚ ਵੱਡਾ ਬਦਲਾਅ ਆਇਆ ਅਤੇ ਸ਼੍ਰੀ ਅਕਾਲ ਤਖ਼ਤ ਨੇ ਨਵੀਂ ਪੰਥਕ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ (ਪੁਨਰਗਠਿਤ) ਦਾ ਗਠਨ ਕੀਤਾ। ਇਸ ਦੇ ਲੀਡਰ ਵਜੋਂ ਸਾਬਕਾ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੂੰ ਚੁਣਿਆ ਗਿਆ ਅਤੇ ਬੀਬੀ ਸਤਵੰਤ ਕੌਰ ਨੂੰ ਪੰਥਕ ਕਮੇਟੀ ਦਾ ਪ੍ਰਧਾਨ ਐਲਾਨਿਆ ਗਿਆ। ਦੂਜੇ ਪਾਸੇ, ਆਉਣ ਵਾਲੀਆਂ ਚੋਣਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਅਕਾਲੀ ਏਕਤਾ ਲਈ ਟਿੱਲ ਲਾਉਂਦੇ ਰਹੇ। ਉਹ ਰੈਲੀਆਂ ਅਤੇ ਸਟੇਜਾਂ ਤੋਂ ਸਾਰੇ ਨਾਰਾਜ਼ ਸਾਥੀਆਂ ਨੂੰ ਸ਼ਿਕਵੇ ਭੁੱਲ ਕੇ ਦੁਬਾਰਾ ਜੁੜਨ ਦੀ ਅਪੀਲ ਕਰਦੇ ਰਹੇ। ਦੋਫਾੜ ਨੇ ਅਕਾਲੀ ਧਿਰ ਨੂੰ ਕਮਜ਼ੋਰ ਕੀਤਾ ਅਤੇ ਪੰਥਕ ਰਾਜਨੀਤੀ ਨੂੰ ਨਵੀਂ ਦਿਸ਼ਾ ਦਿੱਤੀ।
‘ਆਪ’ ਨੂੰ ਮਿਲੀ ਸਿਆਸੀ ਤਾਕਤ
ਜੂਨ ਮਹੀਨੇ ਵਿੱਚ ਲੁਧਿਆਣਾ ਪੱਛਮੀ ਹਲਕਾ ਅਤੇ ਨਵੰਬਰ ਵਿੱਚ ਤਰਨਤਾਰਨ ਵਿੱਚ ਉਪ-ਚੋਣ ਹੋਈ, ਜਦਕਿ ਦਸੰਬਰ ਵਿੱਚ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਪੰਚਾਇਤੀ ਚੋਣਾਂ ਹੋਈਆਂ। ਇਸ ਦੌਰਾਨ ‘ਆਪ’, ਕਾਂਗਰਸ, ਭਾਜਪਾ, ਅਕਾਲੀ ਦਲ ਸਮੇਤ ਸਾਰੀਆਂ ਧਿਰਾਂ ਨੇ ਜਿੱਤ ਲਈ ਜ਼ੋਰ ਲਗਾਇਆ ਪਰ ਤਾਕਤ ਅਤੇ ਜਿੱਤ ‘ਆਪ’ ਨੂੰ ਮਿਲੀ। ਪਹਿਲਾਂ ਲੁਧਿਆਣਾ ਵਿੱਚ ‘ਆਪ’ ਦੇ ਸੰਜੀਵ ਅਰੋੜਾ ਜਿੱਤੇ ਅਤੇ ਮੰਤਰੀ ਬਣੇ। ਫਿਰ ਪੰਥਕ ਹਲਕੇ ਤਰਨਤਾਰਨ ਵਿੱਚ ‘ਆਪ’ ਨੇ ਅਕਾਲੀ ਗੜ੍ਹ ਵਿੱਚ ਸੰਨ੍ਹ ਲਾਈ ਅਤੇ ਜਿੱਤ ਹਾਸਲ ਕੀਤੀ। ਇਸ ਤੋਂ ਬਾਅਦ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਪੰਚਾਇਤੀ ਚੋਣਾਂ ਵਿੱਚ ਵੀ ‘ਆਪ’ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇਨ੍ਹਾਂ ਜਿੱਤਾਂ ਨੇ ‘ਆਪ’ ਦੀ ਪਕੜ ਨੂੰ ਹੋਰ ਮਜਬੂਤ ਕੀਤਾ ਅਤੇ ਹੋਰ ਧਿਰਾਂ ਨੂੰ ਚੁਣੌਤੀ ਪੇਸ਼ ਕੀਤੀ।
ਐੱਸ.ਐੱਸ.ਪੀ. ਮੁਅੱਤਲ, ਦੂਜੇ ਨੂੰ ਛੁੱਟੀ ’ਤੇ ਭੇਜਿਆ
ਚੋਣਾਂ ਵਿੱਚ ਪਾਰਟੀਆਂ ਦੀ ਖਿੱਚੋਤਾਣ ਦਾ ਸੇਕ ਆਈ.ਪੀ.ਐੱਸ. ਅਫਸਰਾਂ ਤੱਕ ਪਹੁੰਚ ਗਿਆ। ਤਰਨਤਾਰਨ ਜ਼ਿਮਨੀ ਚੋਣ ਤੋਂ ਤਿੰਨ ਦਿਨ ਪਹਿਲਾਂ ਭਾਰਤੀ ਚੋਣ ਕਮਿਸ਼ਨ ਨੇ ਤਰਨਤਾਰਨ ਦੀ ਐੱਸ.ਐੱਸ.ਪੀ. ਡਾ. ਰਵਜੋਤ ਕੌਰ ਗਰੇਵਾਲ ਨੂੰ ਲੱਗੇ ਇਲਜ਼ਾਮਾਂ ਕਾਰਨ ਮੁਅੱਤਲ ਕਰ ਦਿੱਤਾ। ਦੋ ਡੀ.ਐੱਸ.ਪੀਆਂ ਦੇ ਤਬਾਦਲੇ ਵੀ ਹੋਏ। ਉਧਰ, ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਪੰਚਾਇਤੀ ਚੋਣਾਂ ਵਿੱਚ ਪਟਿਆਲਾ ਪੁਲਿਸ ਦੀ ਕਥਿਤ ਵਾਇਰਲ ਆਡੀਓ ਰਿਕਾਰਡਿੰਗ ਦੇ ਮਾਮਲੇ ਵਿੱਚ ਐੱਸ.ਐੱਸ.ਪੀ. ਵਰੁਣ ਸ਼ਰਮਾ ਨੂੰ ਅਚਾਨਕ ਛੁੱਟੀ ’ਤੇ ਭੇਜ ਦਿੱਤਾ ਗਿਆ। ਇਹ ਕਾਰਵਾਈ ਅਕਾਲੀ ਦਲ ਦੀ ਸ਼ਿਕਾਇਤ ’ਤੇ ਹੋਈ ਅਤੇ ਮਾਮਲਾ ਹਾਈਕੋਰਟ ਤੱਕ ਪਹੁੰਚ ਗਿਆ। ਇਸ ਤੋਂ ਇਲਾਵਾ ਪੰਜਾਬ ਪੁਲਿਸ ਦੇ ਇੱਕ ਸੀਨੀਅਰ ਅਫਸਰ ਨੂੰ ਭਾਰਤੀ ਚੋਣ ਕਮਿਸ਼ਨ ਸਾਹਮਣੇ ਪੇਸ਼ ਹੋਣਾ ਪਿਆ। ਇਨ੍ਹਾਂ ਘਟਨਾਵਾਂ ਨੇ ਪ੍ਰਸ਼ਾਸਨ ਅਤੇ ਸਿਆਸਤ ਵਿਚਕਾਰ ਤਣਾਅ ਨੂੰ ਉਜਾਗਰ ਕੀਤਾ।
ਆਸਟ੍ਰੇਲੀਆ ਭੱਜੇ ਪਠਾਣਮਾਜਰਾ
ਬਦਕਾਰੀ ਮਾਮਲੇ ਵਿੱਚ ਗ੍ਰਿਫ਼ਤਾਰੀ ਵਾਲੇ ਪਟਿਆਲਾ ਜ਼ਿਲ੍ਹੇ ਦੇ ਸਨੌਰ ਹਲਕੇ ਦੇ ‘ਆਪ’ ਵਿਧਾਇਕ ਹਰਮੀਤ ਸਿੰਘ ਪਠਾਣਮਾਜਰਾ ਆਸਟ੍ਰੇਲੀਆ ਭੱਜ ਗਏ। ਇਹ ਘਟਨਾ ਵੀ ਖੂਬ ਚਰਚਾ ਵਿੱਚ ਰਹੀ। ਪੰਜਾਬ ਪੁਲਿਸ ਉਨ੍ਹਾਂ ਨੂੰ ਦੋ ਮਹੀਨਿਆਂ ਤੋਂ ਲੱਭ ਰਹੀ ਸੀ। ਉਥੇ ਪਹੁੰਚ ਕੇ ਉਨ੍ਹਾਂ ਨੇ ਇੱਕ ਨਿੱਜੀ ਚੈਨਲ ਨੂੰ ਇੰਟਰਵਿਊ ਵੀ ਦਿੱਤਾ। ਇਸ ਦੌਰਾਨ ਪਠਾਣਮਾਜਰਾ ਨੇ ਆਪਣੇ ਵਿਰੁੱਧ ਰਜਿਸਟਰ ਮਾਮਲੇ ਨੂੰ ਝੂਠਾ ਦੱਸਿਆ ਅਤੇ ‘ਆਪ’ ਸਰਕਾਰ ’ਤੇ ਤਿੱਖੇ ਹਮਲੇ ਕੀਤੇ। ਇਹ ਮਾਮਲਾ ਪੰਜਾਬੀ ਸਿਆਸਤ ਵਿੱਚ ਭ੍ਰਿਸ਼ਟਾਚਾਰ ਅਤੇ ਨੈਤਿਕਤਾ ਨੂੰ ਲੈ ਕੇ ਵੱਡੀ ਚਰਚਾ ਪੈਦਾ ਕਰ ਗਿਆ।
ਰਾਜਾ ਵੜਿੰਗ ’ਤੇ ਐੱਫ.ਆਈ.ਆਰ.
ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਅਤੇ ਲੁਧਿਆਣਾ ਤੋਂ ਸੰਸਦ ਮੈਂਬਰ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਤਰਨਤਾਰਨ ਉਪ-ਚੋਣ ਦੌਰਾਨ ਕਈ ਵਿਵਾਦਾਂ ਵਿੱਚ ਫਸੇ ਰਹੇ। ਪਾਰਟੀ ਉਮੀਦਵਾਰ ਦੇ ਪ੍ਰਚਾਰ ਸਮੇਂ ਉਨ੍ਹਾਂ ਨੇ ਦੋ ਸਿੱਖ ਬੱਚਿਆਂ ਦੇ ਕੇਸਾਂ (ਸਿਰ ’ਤੇ ਬੰਨ੍ਹੇ ਜੂੜੇ) ਨੂੰ ਹੱਥ ਨਾਲ ਫੜ ਕੇ ਟਿੱਪਣੀ ਕਰ ਦਿੱਤੀ। ਘਟਨਾ ਦਾ ਵੀਡੀਓ ਸਾਹਮਣੇ ਆਉਂਦੇ ਹੀ ਵੜਿੰਗ ਦਾ ਵਿਰੋਧ ਸ਼ੁਰੂ ਹੋ ਗਿਆ। ਇਸ ਨੂੰ ਸਿੱਖ ਮਰਿਆਦਾ ਦਾ ਅਪਮਾਨ ਕਿਹਾ ਗਿਆ। ਰਾਜਾ ਵੜਿੰਗ ਇੱਥੇ ਨਹੀਂ ਰੁਕੇ– ਭਾਰਤ ਦੇ ਸਾਬਕਾ ਗ੍ਰਹਿ ਮੰਤਰੀ ਬੂਟਾ ਸਿੰਘ ਨੂੰ ਲੈ ਕੇ ਅਪਮਾਨਜਨਕ ਬਿਆਨ ਵੀ ਦੇ ਦਿੱਤੇ। ਇਸ ਤੋਂ ਬਾਅਦ ਕਪੂਰਥਲਾ ਵਿੱਚ ਉਨ੍ਹਾਂ ਵਿਰੁੱਧ ਐੱਫ.ਆਈ.ਆਰ. ਵੀ ਰਜਿਸਟਰ ਹੋ ਗਈ। ਪੰਜਾਬ ਰਾਜ ਅਨੁਸੂਚਿਤ ਜਾਤੀ ਕਮਿਸ਼ਨ ਨੇ ਵੀ ਉਨ੍ਹਾਂ ਨੂੰ ਤਲਬ ਕੀਤਾ। ਇਸ ਵਿਵਾਦ ਨੇ ਕਾਂਗਰਸ ਨੂੰ ਅੰਦਰੂਨੀ ਤਣਾਅ ਵਿੱਚ ਪਾ ਦਿੱਤਾ।
ਅਨਮੋਲ ਗਗਨ ਮਾਨ ਨੇ ਹੈਰਾਨ ਕੀਤਾ
ਖਰੜ ਤੋਂ ‘ਆਪ’ ਵਿਧਾਇਕ ਅਨਮੋਲ ਗਗਨ ਮਾਨ ਨੇ ਵਿਧਾਨ ਸਭਾ ਤੋਂ ਅਚਾਨਕ ਅਸਤੀਫਾ ਦੇ ਦਿੱਤਾ। ਇਸ ਫੈਸਲੇ ਨਾਲ ‘ਆਪ’ ਵਿੱਚ ਖੂਬ ਹਲਚਲ ਮਚ ਗਈ। ਕਾਰਨ ਕੀ ਸੀ, ਇਹ ਅੱਜ ਤੱਕ ਖੁਲਾਸਾ ਨਹੀਂ ਹੋਇਆ, ਪਰ ਦਿੱਲੀ ਵਿੱਚ ਅਰਵਿੰਦ ਕੇਜਰੀਵਾਲ ਨਾਲ ਮੀਟਿੰਗ ਤੋਂ ਬਾਅਦ ਉਸ ਨੇ ਅਸਤੀਫਾ ਵਾਪਸ ਲੈ ਲਿਆ। ਅਨਮੋਲ ਗਗਨ ਮਾਨ ਪੰਜਾਬ ਸਰਕਾਰ ਵਿੱਚ ਮੰਤਰੀ ਰਹਿ ਚੁੱਕੇ ਹਨ। ਉਨ੍ਹਾਂ ਨੇ ਪੰਜਾਬੀ ਗਾਇਕਾ ਤੋਂ ਮੰਤਰੀ ਬਣਨ ਤੱਕ ਦਾ ਸਫ਼ਰ ਤੈਅ ਕੀਤਾ ਸੀ, ਪਰ ਬਾਅਦ ਵਿੱਚ ਮੰਤਰੀ ਦਾ ਅਹੁਦਾ ਵੀ ਗੁਆਇਆ। ਇਹ ਘਟਨਾ ‘ਆਪ’ ਦੇ ਅੰਦਰੂਨੀ ਵਿਵਾਦਾਂ ਨੂੰ ਸਾਹਮਣੇ ਲਿਆਉਂਦੀ ਹੈ।
ਗੋਲੀ ਲੱਗਣ ਨਾਲ ਵਿਧਾਇਕ ਦੀ ਮੌਤ
ਜਨਵਰੀ ਵਿੱਚ ਲੁਧਿਆਣਾ ਪੱਛਮੀ ਹਲਕੇ ਤੋਂ ‘ਆਪ’ ਵਿਧਾਇਕ ਗੁਰਪ੍ਰੀਤ ਗੋਗੀ ਬੱਸੀ ਦੀ ਸਿਰ ਵਿੱਚ ਗੋਲੀ ਲੱਗਣ ਨਾਲ ਮੌਤ ਹੋ ਗਈ। ਪਰਿਵਾਰ ਨੇ ਉਨ੍ਹਾਂ ਨੂੰ ਹਸਪਤਾਲ ਪਹੁੰਚਾਇਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪਰਿਵਾਰ ਅਨੁਸਾਰ ਗੋਗੀ ਆਪਣੀ ਰਿਵਾਲਵਰ ਸਾਫ਼ ਕਰ ਰਹੇ ਸਨ ਤਾਂ ਅਚਾਨਕ ਗੋਲੀ ਚੱਲ ਗਈ ਅਤੇ ਸਿਰ ਵਿੱਚ ਲੱਗ ਗਈ। ਇਹ ਘਟਨਾ ਸਿਆਸੀ ਹਲਕਿਆਂ ਵਿੱਚ ਖੂਬ ਚਰਚਾ ਵਿੱਚ ਰਹੀ ਅਤੇ ‘ਆਪ’ ਨੇ ਆਪਣਾ ਇੱਕ ਵਿਧਾਇਕ ਗੁਆ ਲਿਆ।
ਚੋਣਾਂ ਤੋਂ ਪਹਿਲਾਂ ‘ਆਪ’ ਵਿੱਚ ਹੋ ਗਏ ਅਕਾਲੀ ਨੇਤਾ
ਤਰਨਤਾਰਨ ਉਪ-ਚੋਣ ਤੋਂ ਪਹਿਲਾਂ ਤਿੰਨ ਵਾਰ ਵਿਧਾਇਕ ਰਹੇ ਅਕਾਲੀ ਨੇਤਾ ਹਰਮੀਤ ਸਿੰਘ ਸੰਧੂ ਅਚਾਨਕ ‘ਆਪ’ ਵਿੱਚ ਸ਼ਾਮਲ ਹੋ ਗਏ। ਅਕਾਲੀ ਧਿਰ ਹੈਰਾਨ ਰਹਿ ਗਈ, ਕਿਉਂਕਿ ਉਹ ਉਨ੍ਹਾਂ ’ਤੇ ਹੀ ਦਾਅ ਖੇਡ ਰਹੀ ਸੀ। ‘ਆਪ’ ਨੇ ਸੰਧੂ ਨੂੰ ਆਪਣਾ ਉਮੀਦਵਾਰ ਬਣਾ ਕੇ ਮੈਦਾਨ ਵਿੱਚ ਉਤਾਰ ਦਿੱਤਾ ਅਤੇ ਉਹ ਜਿੱਤ ਗਏ। ਅਕਾਲੀਆਂ ਨੂੰ ਦੂਜਾ ਚਿਹਰਾ ਲੱਭ ਕੇ ਉਸ ਨੂੰ ਉਤਾਰਨਾ ਪਿਆ। ਇਸ ਘਟਨਾ ਨੇ ਚੋਣ ਰਣਨੀਤੀ ਹੀ ਬਦਲ ਦਿੱਤੀ।
ਵਿਧਾਇਕ ਨੂੰ ਸਜ਼ਾ
ਛੇੜਛਾੜ ਅਤੇ ਮਾਰ ਕੁਟਾਈ ਦੇ 12 ਸਾਲ ਪੁਰਾਣੇ ਮਾਮਲੇ ਵਿੱਚ ਖਡੂਰ ਸਾਹਿਬ ਤੋਂ ‘ਆਪ’ ਵਿਧਾਇਕ ਮਨਜਿੰਦਰ ਸਿੰਘ ਲਾਲਪੁਰਾ ਨੂੰ ਸੁਣਾਈ ਗਈ ਚਾਰ ਸਾਲਾਂ ਦੀ ਸਜ਼ਾ ਦੇ ਆਦੇਸ਼ ’ਤੇ ਹਾਈਕੋਰਟ ਵੱਲੋਂ ਰੋਕ ਵੀ ਸਿਆਸੀ ਹਲਕਿਆਂ ਵਿੱਚ ਚਰਚਾ ਦਾ ਵਿਸ਼ਾ ਰਿਹਾ। ਉਨ੍ਹਾਂ ਦੀ ਮੈਂਬਰੀ ’ਤੇ ਵੀ ਤਲਵਾਰ ਲਟਕੀ ਹੋਈ ਹੈ। 10 ਸਤੰਬਰ 2025 ਨੂੰ ਤਰਨਤਾਰਨ ਦੀ ਅਦਾਲਤ ਨੇ ਵਿਧਾਇਕ ਲਾਲਪੁਰਾ ਨੂੰ ਦੋਸ਼ੀ ਠਹਿਰਾਉਂਦੇ ਹੋਏ ਚਾਰ ਸਾਲਾਂ ਦੀ ਸਜ਼ਾ ਸੁਣਾਈ ਸੀ। ਇਹ ਮਾਮਲਾ ਸਿਆਸੀ ਨੈਤਿਕਤਾ ਨੂੰ ਲੈ ਕੇ ਵੱਡੀ ਚਰਚਾ ਪੈਦਾ ਕਰ ਰਿਹਾ ਹੈ।
2025 ਵਿੱਚ ਪੰਜਾਬ ਨੇ ਸਿਆਸੀ ਉਥਲ-ਪਥਲ ਦੇ ਨਾਲ-ਨਾਲ ਚੋਣ ਜਿੱਤਾਂ ਅਤੇ ਵਿਵਾਦਾਂ ਦੇ ਨਾਲ ਇੱਕ ਨਵਾਂ ਰੰਗ ਵੇਖਿਆ। ਅਗਲੇ ਸਾਲ ਵਿਧਾਨ ਸਭਾ ਚੋਣਾਂ ਨਾਲ ਇਹ ਹਲਚਲ ਹੋਰ ਵਧੇਗੀ। ਪੰਜਾਬੀ ਰਾਜਨੀਤੀ ਵਿੱਚ ‘ਆਪ’ ਦੀ ਤਾਕਤ ਵਧੀ ਹੈ। ਹੁਣ ਅਕਾਲੀ ਦਲ ਅਤੇ ਕਾਂਗਰਸ ਨੂੰ ਨਵੀਆਂ ਰਣਨੀਤੀਆਂ ਬਣਾਉਣੀਆਂ ਪੈਣਗੀਆਂ।