ਝਿਜਕੋ ਤੇ ਡਰੋ ਨਾ! ਨਫਰਤੀ ਅਪਰਾਧ ਬਾਰੇ ਰਿਪੋਰਟ ਕਰੋ

ਕੁਲਜੀਤ ਦਿਆਲਪੁਰੀ
ਸ਼ਿਕਾਗੋ: ਅਮਰੀਕਾ ਵਿੱਚ “ਨਫਰਤ ਦੇ ਖਿਲਾਫ ਇੱਕਜੁੱਟਤਾ” ਤਹਿਤ ਨਫਰਤੀ ਅਪਰਾਧਾਂ ਨਾਲ ਕਿਵੇਂ ਨਜਿੱਠਣਾ ਹੈ ਅਤੇ ਨਫਰਤੀ ਅਪਰਾਧ ਦੀ ਦਰਪੇਸ਼ ਸਮੱਸਿਆ ਸਮੇਂ ਨਫਰਤ ਵਿਰੋਧੀ ਸਰਕਾਰੀ ਤੇ ਗੈਰ-ਸਰਕਾਰੀ ਸੰਸਥਾਵਾਂ ਨਾਲ ਕਿਵੇਂ ਰਾਬਤਾ ਬਣਾਉਣਾ ਹੈ? ਆਦਿ ਸਬੰਧੀ ਇੱਕ ਵਿਸ਼ੇਸ਼ ਸੈਮੀਨਾਰ ਲੰਘੇ ਸਨਿਚਰਵਾਰ ਸ਼ਾਮ ਨੂੰ ਗੁਰਦੁਆਰਾ ਪੈਲਾਟਾਈਨ ਵਿਖੇ ਕਰਵਾਇਆ ਗਿਆ।

ਇਸ ਮੌਕੇ ਯੂ.ਐਸ. ਅਟਾਰਨੀ ਦੇ ਨਾਰਦਰਨ ਡਿਸਟ੍ਰਿਕਟ ਆਫ ਇਲੀਨਾਏ ਦਫਤਰ ਤੋਂ ਕ੍ਰਿਸਟੋਫਰ ਵੀਚ; ਐਫ.ਬੀ.ਆਈ. ਵੱਲੋਂ ਐਚਲ ਬ੍ਰਾਇਨ ਜੇ. (ਸੀ.ਜੀ.), ਸ਼ੈਲੀ ਗ੍ਰੀਜ਼ ਤੇ ਜੌਹਨ ਮਰੋਜ਼ਕਜ਼ਾਕ; ਕੁਕ ਕਾਉਂਟੀ ਸਟੇਟਸ ਅਟਾਰਨੀ ਦਫਤਰ ਤੋਂ ਡੇਵਿਡ ਵਿਲੀਅਮਜ਼; ਪੈਲਾਟਾਈਨ ਪੁਲਿਸ ਡਿਪਾਰਟਮੈਂਟ ਤੋਂ ਅਫਸਰ ਟਾਈਲਰ ਗ੍ਰੇਟਜ਼ ਤੇ ਜਾਸੂਸ ਜੈਫ ਬ੍ਰਾਊਨ ਅਤੇ ਐਂਟੀ ਡੈਫਾਮੇਸ਼ਨ ਲੀਗ (ਏ.ਡੀ.ਐਲ.) ਦੇ ਨੁਮਾਇੰਦਿਆਂ- ਸ਼ਰਨ ਕੌਰ ਸਿੰਘ ਤੇ ਗੋਮੇਜ਼ ਐਂਟੋਨੀਓ ਨੇ ਨਫਰਤੀ ਅਪਰਾਧਾਂ ਨਾਲ ਨਜਿੱਠਣ ਸਬੰਧੀ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਨੇ ਨਫਰਤੀ ਅਪਰਾਧ ਦੀ ਪਛਾਣ ਕਰਨ ਅਤੇ ਉਸ ਸਬੰਧੀ ਰਿਪੋਰਟ ਦੀ ਮਹੱਤਤਾ ਉੱਤੇ ਚਾਨਣਾ ਪਾਇਆ। ਉਨ੍ਹਾਂ ਕਿਹਾ ਕਿ ਚੰਗੇ ਲਈ ਨਫ਼ਰਤ ਨਾਲ ਲੜਨਾ, ਲੋਕਾਂ ਦੀ ਮਾਣਹਾਨੀ ਨੂੰ ਰੋਕਣਾ ਅਤੇ ਸਾਰਿਆਂ ਨਾਲ ਨਿਆਂ ਤੇ ਨਿਰਪੱਖ ਵਿਵਹਾਰ ਨੂੰ ਸੁਰੱਖਿਅਤ ਕਰਨਾ ਟੀਚਾ ਹੈ।
ਸੈਮੀਨਾਰ ਦੌਰਾਨ ਨਫਰਤ ਦੀਆਂ ਕਾਰਵਾਈਆਂ ਨੂੰ ਰੋਕਣ ਦੀ ਰਣਨੀਤੀ ਬਾਰੇ ਚਰਚਾ ਕਰਨ ਦੇ ਨਾਲ ਨਾਲ ਸੰਗਤ ਨੂੰ ਸੁਚੇਤ ਕੀਤਾ ਗਿਆ ਕਿ ਨਫਰਤੀ ਅਪਰਾਧ ਦੀ ਦਰਪੇਸ਼ ਚੁਣੌਤੀ ਸਮੇਂ ਸਾਨੂੰ ਕੀ ਕਰਨਾ ਚਾਹੀਦਾ ਹੈ ਅਤੇ ਇਸ ਦੀ ਬੇਝਿਜਕ ਰਿਪੋਰਟ ਕਿਵੇਂ ਅਤੇ ਕਿਸ ਨੂੰ ਕਰਨੀ ਹੈ! ਰਿਪੋਰਟ ਮਿਲਣ `ਤੇ ਨਫ਼ਰਤੀ ਅਪਰਾਧਾਂ ਵਿਰੁੱਧ ਐਫ.ਬੀ.ਆਈ. ਸਮੇਤ ਪੁਲਿਸ ਵਿਭਾਗ ਤੇ ਹੋਰ ਸੁਰੱਖਿਆ ਏਜੰਸੀਆਂ ਦੀ ਭੂਮਿਕਾ ਬਾਰੇ ਸੰਗਤ ਨੂੰ ਵਿਸਥਾਰ ਨਾਲ ਦੱਸਿਆ ਗਿਆ। ਦੱਸਿਆ ਗਿਆ ਕਿ ਐਫ.ਬੀ.ਆਈ. ਇੱਕ ਪ੍ਰਾਇਮਰੀ ਸੰਘੀ ਏਜੰਸੀ ਹੈ, ਜੋ ਸੰਘੀ ਨਾਗਰਿਕ ਅਧਿਕਾਰਾਂ ਦੇ ਨਿਯਮਾਂ ਦੀ ਉਲੰਘਣਾ ਦੇ ਸਬੰਧ ਵਿੱਚ ਸਾਰੇ ਦੋਸ਼ਾਂ ਦੀ ਜਾਂਚ ਕਰਦੀ ਹੈ। ਸਿਵਲ ਰਾਈਟਸ ਪ੍ਰੋਗਰਾਮ ਨੂੰ ਤਿੰਨ ਉਪ-ਪ੍ਰੋਗਰਾਮਾਂ ਵਿੱਚ ਵੰਡਿਆ ਗਿਆ ਹੈ: ਅਪਰਾਧ, ਕਾਨੂੰਨ ਦੀ ਉਲੰਘਣਾ ਦਾ ਰੰਗ (ਕਿਸਮ) ਅਤੇ ਕਲਿਨਿਕ ਐਨ ਟਰਾਂਸ (FACE) ਐਕਟ ਤੱਕ ਪਹੁੰਚ ਦੀ ਆਜ਼ਾਦੀ।
ਖਦਸ਼ਾ ਪ੍ਰਗਟਾਇਆ ਗਿਆ ਕਿ ਨਫ਼ਰਤੀ ਕਿਸਮ ਦੇ ਅਪਰਾਧ ਪਰਿਵਾਰਾਂ ਅਤੇ ਭਾਈਚਾਰਿਆਂ `ਤੇ ਕਦੇ ਵੀ ਤੇ ਕਿਤੇ ਵੀ ਹੋ ਸਕਦੇ ਹਨ ਅਤੇ ਇਸ ਲਈ ਸੁਚੇਤ ਹੋ ਕੇ ਕਿਸੇ ਵੀ ਕਿਸਮ ਦੇ ਨਫ਼ਰਤੀ ਅਪਰਾਧ ਦੀ ਸੂਚਨਾ ਸੁਰੱਖਿਆ ਏਜੰਸੀਆਂ ਨੂੰ ਦੇਣ ਤੋਂ ਹਿਚਕਚਾਹਟ ਨਹੀਂ ਕਰਨੀ ਚਾਹੀਦੀ। ਜ਼ਿਕਰਯੋਗ ਹੈ ਕਿ ਨਫ਼ਰਤੀ ਅਪਰਾਧ ਦੀ ਪਰਿਭਾਸ਼ਾ “ਕਿਸੇ ਵਿਅਕਤੀ ਜਾਂ ਸੰਪੱਤੀ ਦੇ ਵਿਰੁੱਧ ਇੱਕ ਸਜ਼ਾਯੋਗ ਅਪਰਾਧ ਹੈ, ਜੋ ਕਿਸੇ ਨਸਲ, ਧਰਮ, ਅਪਾਹਜਤਾ, ਨਸਲੀ/ਰਾਸ਼ਟਰੀ ਮੂਲ, ਜਿਨਸੀ ਰੁਝਾਨ, ਲਿੰਗ ਪਛਾਣ ਆਦਿ ਦੇ ਵਿਰੁੱਧ ਵਿਅਕਤੀ ਦੇ ਪੱਖਪਾਤ ਦੁਆਰਾ ਪ੍ਰੇਰਿਤ ਹੈ।”
ਦੱਸਿਆ ਗਿਆ ਕਿ ਐਫ.ਬੀ.ਆਈ. ਹਰ ਸਾਲ ਸੈਂਕੜੇ ਨਫ਼ਰਤੀ ਅਪਰਾਧਾਂ ਦੀ ਜਾਂਚ ਕਰਦੀ ਹੈ ਅਤੇ ਕਾਨੂੰਨ ਲਾਗੂ ਕਰਨ ਲਈ ਸਹਾਇਤਾ, ਸਿਖਲਾਈ, ਜਨਤਕ ਪਹੁੰਚ ਅਤੇ ਬਹੁਤ ਸਾਰੇ ਭਾਈਚਾਰਕ ਸਮੂਹਾਂ ਨਾਲ ਸਾਂਝੇਦਾਰੀ ਰਾਹੀਂ ਹੋਰ ਘਟਨਾਵਾਂ ਦਾ ਪਤਾ ਲਗਾਉਣ ਤੇ ਰੋਕਣ ਲਈ ਕੰਮ ਕਰਦੀ ਹੈ।
ਬੁਲਾਰਿਆਂ ਅਨੁਸਾਰ ਨਫ਼ਰਤੀ ਅਪਰਾਧਾਂ ਦੀ ਜਾਂਚ ਵਿੱਚ ਰਾਜ/ਸਥਾਨਕ ਅਥਾਰਟੀਆਂ ਮਿਲ ਕੇ ਕੰਮ ਕਰਦੀਆਂ ਹਨ, ਜਦਕਿ ਐਫ.ਬੀ.ਆਈ. ਸਰੋਤ ਫੋਰੈਂਸਿਕ ਮੁਹਾਰਤ ਤੇ ਪਛਾਣ ਵਿੱਚ ਅਨੁਭਵ ਅਤੇ ਨਫ਼ਰਤ-ਆਧਾਰਤ ਪ੍ਰੇਰਣਾਵਾਂ ਦੇ ਸਬੂਤ ਅਕਸਰ ਸਥਾਨਕ ਕਾਨੂੰਨ ਲਾਗੂ ਕਰਨ ਲਈ ਅਹਿਮ ਵਜੋਂ ਪ੍ਰਦਾਨ ਕਰਦੇ ਹਨ। ਇਸ ਤੋਂ ਇਲਾਵਾ ਐਫ.ਬੀ.ਆਈ. ਸੰਘੀ ਤੇ ਸਥਾਨਕ ਕਾਨੂੰਨ ਲਾਗੂ ਕਰਨ, ਘੱਟ ਗਿਣਤੀ ਤੇ ਧਾਰਮਿਕ ਸੰਸਥਾਵਾਂ ਅਤੇ ਭਾਈਚਾਰਕ ਸਮੂਹਾਂ ਲਈ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨ ਅਤੇ ਨਾਗਰਿਕ ਅਧਿਕਾਰਾਂ ਦੇ ਕਾਨੂੰਨਾਂ ਬਾਰੇ ਸਿੱਖਿਆ ਪ੍ਰਦਾਨ ਕਰਨ ਲਈ ਸਾਲਾਨਾ ਸੈਂਕੜੇ ਸੈਮੀਨਾਰ, ਵਰਕਸ਼ਾਪਾਂ ਅਤੇ ਸਿਖਲਾਈ ਸੈਸ਼ਨਾਂ ਦਾ ਆਯੋਜਨ ਕਰਦੀ ਹੈ। ਹਰ ਸਾਲ, ਐਫ.ਬੀ.ਆਈ. ਦੁਨੀਆ ਭਰ ਵਿੱਚ ਨਵੇਂ ਏਜੰਟਾਂ, ਸੈਂਕੜੇ ਮੌਜੂਦਾ ਏਜੰਟਾਂ ਅਤੇ ਹਜ਼ਾਰਾਂ ਪੁਲਿਸ ਅਧਿਕਾਰੀਆਂ ਲਈ ਨਫ਼ਰਤੀ ਅਪਰਾਧਾਂ ਦੀ ਸਿਖਲਾਈ ਵੀ ਪ੍ਰਦਾਨ ਕਰਦੀ ਹੈ।
ਨਫ਼ਰਤੀ ਅਪਰਾਧਾਂ ਨੂੰ ਨਕੇਲ ਪਾਉਣ ਲਈ ਐਫ.ਬੀ.ਆਈ., ਪੁਲਿਸ ਵਿਭਾਗ ਅਤੇ ਹੋਰ ਸੁਰੱਖਿਆ ਏਜੰਸੀਆਂ ਨੇ ਤਾਲਮੇਲ ਸਥਾਪਤ ਕਰਨ, ਜਾਣਕਾਰੀ ਸਾਂਝੀ ਕਰਨ, ਚਿੰਤਾਵਾਂ ਨੂੰ ਦੂਰ ਕਰਨ ਤੇ ਸਮੱਸਿਆਵਾਂ ਨੂੰ ਹੱਲ ਕਰਨ ਵਿੱਚ ਸਹਿਯੋਗ ਕਰਨ ਲਈ ਕਈ ਨਾਗਰਿਕ ਅਧਿਕਾਰ ਸੰਗਠਨਾਂ ਨਾਲ ਰਾਸ਼ਟਰੀ ਤੇ ਸਥਾਨਕ ਤੌਰ `ਤੇ ਭਾਈਵਾਲੀ ਬਣਾਈ ਹੈ। ਬੁਲਾਰਿਆਂ ਮੁਤਾਬਕ ਕ੍ਰਾਈਮ ਰਿਪੋਰਟ ਦੀ ਵਰਤੋਂ ਰਾਹੀਂ ਸੁਰੱਖਿਆ ਏਜੰਸੀਆਂ ਸਾਲਾਨਾ ਆਧਾਰ `ਤੇ ਅਮਰੀਕਾ ਦੇ ਅੰਦਰ ਕੀਤੇ ਗਏ ਨਫ਼ਰਤੀ ਅਪਰਾਧਾਂ ਦੀ ਇੱਕ ਵਿਆਪਕ ਰਿਪੋਰਟਿੰਗ ਇਕੱਠੀ ਕਰਨ ਅਤੇ ਪ੍ਰਦਾਨ ਕਰਨ ਦੀ ਕੋਸ਼ਿਸ਼ ਵੀ ਕਰਦੀਆਂ ਹਨ। ਗੁਰਦੁਆਰਾ ਪੈਲਾਟਾਈਨ ਵਿਖੇ ਇਸ ਸਬੰਧੀ ਸੈਮੀਨਾਰ ਵੀ ਵੱਖ-ਵੱਖ ਭਾਈਚਾਰਿਆਂ ਨੂੰ ਜਾਣਕਾਰੀ ਮੁਹੱਈਆ ਕਰਵਾਉਣ ਦੇ ਮਕਸਦ ਨਾਲ ਹੀ ਕੀਤੀ ਗਿਆ।
ਪ੍ਰਾਜੈਕਟਰ ਦੀ ਮਦਦ ਨਾਲ ਦੱਸਿਆ ਗਿਆ ਕਿ ਸੰਸਥਾ ਸਭ ਭਾਈਚਾਰਿਆਂ ਦੀ ਇਕੱਠੇ ਸੁਰੱਖਿਆ ਕਰਨ ਵਿੱਚ ਕਿਵੇਂ ਮਦਦਗਾਰ ਸਾਬਤ ਹੁੰਦੀ ਹੈ। ਕਿਉਂਕਿ ਸੰਘੀ ਪੱਧਰ `ਤੇ ਨਫ਼ਰਤ ਅਪਰਾਧ ਨੂੰ ਇੱਕ ਸਜ਼ਾਯੋਗ ਅਪਰਾਧ ਵਜੋਂ ਪਰਿਭਾਸ਼ਿਤ ਕੀਤਾ ਜਾਂਦਾ ਹੈ ਜੋ ਕਿਸੇ ਨਸਲ, ਧਰਮ, ਅਪਾਹਜਤਾ, ਨਸਲੀ ਜਾਂ ਰਾਸ਼ਟਰੀ ਮੂਲ, ਜਿਨਸੀ ਝੁਕਾਅ, ਲਿੰਗ, ਜਾਂ ਲਿੰਗ ਪਛਾਣ ਦੇ ਵਿਰੁੱਧ ਅਪਰਾਧੀ ਦੇ ਪੱਖਪਾਤ ਦੁਆਰਾ ਪੂਰੇ ਜਾਂ ਅੰਸ਼ਕ ਰੂਪ ਵਿੱਚ ਪ੍ਰੇਰਿਤ ਹੁੰਦਾ ਹੈ।
ਇਸ ਮੌਕੇ ਵੱਖ-ਵੱਖ ਥਾਈਂ ਸਰਗਰਮ ਨਫਰਤੀ ਸਮੂਹਾਂ ਬਾਰੇ ਵੀ ਜਾਣਕਾਰੀ ਸਾਂਝੀ ਕੀਤੀ ਗਈ, ਜੋ ਨਫਰਤੀ ਅਪਰਾਧ ਨੂੰ ਉਤਸ਼ਾਹਿਤ ਕਰਦੇ ਹਨ ਅਤੇ ਅਸਾਵਾਂ ਮਾਹੌਲ ਸਿਰਜ ਕੇ ਅਮਨ-ਅਮਾਨ ਨੂੰ ਭੰਗ ਕਰਨ ਵਿੱਚ ਭੂਮਿਕਾ ਨਿਭਾਉਂਦੇ ਹਨ।
ਬੁਲਾਰਿਆਂ ਦੀ ਸਪਸ਼ਟ ਸਲਾਹ ਸੀ ਕਿ ਜੇਕਰ ਤੁਹਾਨੂੰ ਕਿਸੇ ਵੀ ਕਿਸਮ ਦੀ ਨਫ਼ਰਤੀ ਧਮਕੀ ਮਿਲਦੀ ਹੈ, ਤਾਂ ਤੁਰੰਤ 911 `ਤੇ ਕਾਲ ਕਰੋ। ਨਫਰਤੀ ਅਪਰਾਧ ਦੀ ਰਿਪੋਰਟ 1-800-CALL-FBI ਜਾਂ ਵੈਬਸਾਈਟ tips.fbi.gov ਉਤੇ ਦਰਜ ਕਰਵਾਈ ਜਾ ਸਕਦੀ ਹੈ। ਇਸ ਤੋਂ ਇਲਾਵਾ ਆਪਣੇ ਖੇਤਰ ਨਾਲ ਸਬੰਧਤ ਫੀਲਡ ਦਫਤਰਾਂ ਨਾਲ ਵੀ ਸੰਪਰਕ ਕੀਤਾ ਜਾ ਸਕਦਾ ਹੈ, ਜਿਵੇਂ: ਸ਼ਿਕਾਗੋ 312-421-6700; ਮਿਲਵਾਕੀ 414-276-4684; ਇੰਡੀਅਨਐਪੋਲਿਸ 317-595-4000; ਸਿਨਸਿਨੈਟੀ 513-421-4310 ਅਤੇ ਕਲੀਵਲੈਂਡ 216-522-1400 ਆਦਿ।
ਇਸੇ ਦੌਰਾਨ ਨਫ਼ਰਤੀ ਅਪਰਾਧ ਵਿਰੋਧੀ ਸੰਗਠਨ ਏ.ਡੀ.ਐਲ. ਦੀ ਮਿੱਡਵੈਸਟ ਇਕਾਈ ਦੀ ਨੁਮਾਇੰਦਾ ਬੀਬੀ ਸ਼ਰਨ ਕੌਰ ਸਿੰਘ ਨੇ ਆਪਣੇ ਸੰਗਠਨ ਬਾਰੇ ਵੇਰਵਾ ਦਿੰਦਿਆਂ ਇਸ ਵੱਲੋਂ ਨਫ਼ਰਤੀ ਕਿਸਮ ਦੇ ਅਪਰਾਧ ਰੋਕਣ ਅਤੇ ਸਬੰਧਤ ਮਾਮਲਿਆਂ ਨਾਲ ਨਜਿੱਠਣ ਲਈ ਨਿਭਾਈਆਂ ਜਾਂਦੀਆਂ ਸੇਵਾਵਾਂ ਬਾਰੇ ਸੰਗਤ ਨਾਲ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਏ.ਡੀ.ਐਲ. ਹਰ ਤਰ੍ਹਾਂ ਦੇ ਵਿਰੋਧੀਵਾਦ ਦਾ ਪਰਦਾਫਾਸ਼ ਕਰਦਾ ਹੈ ਅਤੇ ਵਿਅਕਤੀਆਂ ਤੇ ਭਾਈਚਾਰਿਆਂ ਨੂੰ ਇਸ ਸਦੀਆਂ ਪੁਰਾਣੀ ਨਫ਼ਰਤ ਨਾਲ ਲੜਨ ਲਈ ਸ਼ਕਤੀ ਪ੍ਰਦਾਨ ਕਰਦਾ ਹੈ। ਏ.ਡੀ.ਐਲ. ਸੰਗਠਨ ਵਿਰੋਧੀ ਘਟਨਾਵਾਂ ਦੀ ਨਿਗਰਾਨੀ ਕਰਦਾ ਹੈ ਅਤੇ ਅਜਿਹੇ ਰੁਝਾਨਾਂ ਦਾ ਵਿਸ਼ਲੇਸ਼ਣ ਕਰਕੇ ਨੀਤੀਗਤ ਹੱਲ ਦੀ ਵਕਾਲਤ ਕਰਦਾ ਹੈ।
ਉਨ੍ਹਾਂ ਦੱਸਿਆ ਕਿ ਏ.ਡੀ.ਐਲ. ਸੰਗਠਨ ਕੱਟੜਵਾਦ, ਅੱਤਵਾਦ ਅਤੇ ਨਫ਼ਰਤ ਦੇ ਸਾਰੇ ਰੂਪਾਂ `ਤੇ ਮੋਹਰੀ ਗੈਰ-ਸਰਕਾਰੀ ਅਥਾਰਟੀ ਹੋਣ ਦੇ ਨਾਤੇ ਵਿਚਾਰਧਾਰਕ ਕੱਟੜਪੰਥੀ ਖਤਰਿਆਂ ਨੂੰ ਟਰੈਕ ਕਰ ਕੇ ਬੇਨਕਾਬ ਕਰਦਾ ਹੈ। ਸੰਗਠਨ ਦਾ ਕੰਮ ਕਾਨੂੰਨ ਲਾਗੂ ਕਰਨ, ਚੁਣੇ ਹੋਏ ਅਧਿਕਾਰੀਆਂ ਅਤੇ ਕਮਿਊਨਿਟੀ ਲੀਡਰਾਂ ਨੂੰ ਉਭਰ ਰਹੇ ਖਤਰਿਆਂ ਦੀ ਪਛਾਣ ਕਰਨ ਅਤੇ ਜਵਾਬ ਦੇਣ ਵਿੱਚ ਮਦਦ ਕਰਦਾ ਹੈ। ਸੰਗਠਨ ਸਾਰਿਆਂ ਲਈ ਨਾਗਰਿਕ ਅਧਿਕਾਰਾਂ ਅਤੇ ਨਾਗਰਿਕ ਆਜ਼ਾਦੀਆਂ ਦੀ ਰੱਖਿਆ ਲਈ ਸਰਕਾਰ ਦੇ ਸਾਰੇ ਪੱਧਰਾਂ `ਤੇ ਵਕਾਲਤ ਕਰਦਾ ਹੈ। ਉਨ੍ਹਾਂ ਖਾਲਿਸਤਾਨੀ ਪੱਖੀ ਤੇ ਸਿੱਖਸ ਫਾਰ ਜਸਟਿਸ ਦੇ ਆਗੂ ਵਕੀਲ ਗੁਰਪਤਵੰਤ ਸਿੰਘ ਪੰਨੂ ਨਾਲ ਸਬੰਧਤ ਹਾਲੀਆ ਮਾਮਲੇ ਦਾ ਜ਼ਿਕਰ ਵੀ ਕੀਤਾ। ਉਨ੍ਹਾਂ ਨਫ਼ਰਤੀ ਅਪਰਾਧਾਂ ਦੇ ਮਾਮਲਿਆਂ ਬਾਰੇ ਅਤੇ ਸੰਗਠਨ ਦੀਆਂ ਸਾਲ 2022-2023 ਦੀਆਂ ਗਤੀਵਿਧੀਆਂ ਬਾਰੇ ਸੰਖੇਪ ਜਾਣਕਾਰੀ ਵੀ ਸਾਂਝੀ ਕੀਤੀ। ਦੁਨੀਆ ਭਰ ਵਿੱਚ ਚੁਣੌਤੀਆਂ ਅਤੇ ਜਟਿਲਤਾਵਾਂ ਦਾ ਸਾਹਮਣਾ ਕਰਨ ਲਈ ਸਿੱਖਿਅਤ ਕਰਨ ਪ੍ਰਤੀ ਵੀ ਏ.ਡੀ.ਐਲ. ਵੱਲੋਂ ਉਪਰਾਲੇ ਕੀਤੇ ਜਾਂਦੇ ਹਨ।
ਏ.ਡੀ.ਐਲ. ਵੱਲੋਂ ਮੁਹੱਈਆ ਦਸਤਾਵੇਜ਼ੀ ਜਾਣਕਾਰੀ ਅਨੁਸਾਰ ਇਹ ਸੰਗਠਨ ਆਨਲਾਈਨ ਨਫ਼ਰਤ ਅਤੇ ਪਰੇਸ਼ਾਨੀ ਦੇ ਖਿਲਾਫ ਵਿਸ਼ਵਵਿਆਪੀ ਲੜਾਈ ਦੀ ਅਗਵਾਈ ਵੀ ਕਰਦਾ ਹੈ। ਸੰਗਠਨ ਦਾ ਮੰਨਣਾ ਹੈ ਕਿ ਉਸ ਦਾ ਵਿਲੱਖਣ ਦ੍ਰਿਸ਼ਟੀਕੋਣ ਅਤੇ ਮੁਹਾਰਤ ਅਮਰੀਕੀ ਲੋਕਤੰਤਰ ਨੂੰ ਕੱਟੜਵਾਦ ਤੇ ਨਫ਼ਰਤ ਦੇ ਤੁਰੰਤ ਖਤਰਿਆਂ ਤੋਂ ਬਚਾਉਣ ਵਿੱਚ ਮਦਦ ਕਰ ਸਕਦੀ ਹੈ। ਇਹ ਖਦਸ਼ਾ ਪ੍ਰਗਟਾਇਆ ਗਿਆ ਕਿ ਜੇ ਪੱਖਪਾਤੀ ਰਵੱਈਏ ਅਤੇ ਕਾਰਵਾਈਆਂ ਦੀ ਜਾਂਚ ਨਾ ਕੀਤੀ ਜਾਵੇ ਤਾਂ ਨਫ਼ਰਤ ਵਧ ਸਕਦੀ ਹੈ। ਸੰਗਠਨ ਚੁਣੇ ਹੋਏ ਅਧਿਕਾਰੀਆਂ, ਨੀਤੀ ਨਿਰਮਾਤਾਵਾਂ ਅਤੇ ਤਕਨੀਕੀ ਕੰਪਨੀਆਂ ਨਾਲ ਅਜਿਹੀਆਂ ਨੀਤੀਆਂ ਨੂੰ ਰੂਪ ਦੇਣ ਲਈ ਸ਼ਾਮਲ ਹੁੰਦਾ ਹੈ, ਜੋ ਹਰ ਕਿਸਮ ਦੀ ਨਫ਼ਰਤ ਨਾਲ ਲੜਦੀਆਂ ਹਨ।
ਸੈਮੀਨਾਰ ਦੇ ਅਖੀਰ ਵਿੱਚ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਤਰਫੋਂ ਸ. ਅੱਛਰ ਸਿੰਘ ਨੇ ਆਏ ਨੁਮਾਇੰਦਿਆਂ ਦਾ ਸੰਗਤ ਨਾਲ ਅਹਿਮ ਜਾਣਕਾਰੀ ਸਾਂਝੀ ਕਰਨ ਲਈ ਧੰਨਵਾਦ ਕੀਤਾ।
ਇਸ ਮੌਕੇ ਨਫਰਤੀ ਅਪਰਾਧ ਸਬੰਧੀ ਜਾਣਕਾਰੀ ਨਾਲ ਭਰਪੂਰ ਦਸਤਾਵੇਜ਼ਾਂ ਦੀ ਪ੍ਰਦਰਸ਼ਨ ਵੀ ਲਾਈ ਗਈ ਸੀ, ਜਿੱਥੋਂ ਸੰਗਤ ਦੇ ਮੈਂਬਰਾਂ ਨੇ ਵੱਖ-ਵੱਖ ਟੇਬਲਾਂ `ਤੇ ਮੁਹੱਈਆ ਕਰਵਾਏ ਗਏ ਜਾਣਕਾਰੀ ਵਾਲੇ ਪਰਚੇ ਤੇ ਕਿਤਾਬਚੇ ਪ੍ਰਾਪਤ ਕੀਤੇ। ਸੰਗਤ ਨੇ ਵਿਭਾਗੀ ਨੁਮਾਇੰਦਿਆਂ ਨਾਲ ਨਫਰਤੀ ਅਪਰਾਧ ਜਾਂ ਕੱਟੜਵਾਦ ਸਬੰਧੀ ਵਾਰਤਾਲਾਪ ਵੀ ਕੀਤੀ ਅਤੇ ਆਪਣੇ ਆਲੇ-ਦੁਆਲੇ ਜਾਂ ਗੁਆਂਢ ਵਿੱਚ ਨਫਰਤੀ ਅਪਰਾਧ ਦੇ ਸੰਭਾਵੀ ਖਦਸ਼ਿਆਂ ਨਾਲ ਸਬੰਧਤ ਸਵਾਲ ਜਵਾਬ ਵੀ ਕੀਤੇ।
ਲੋਕਾਂ ਤੱਕ ਜਾਣਕਾਰੀ ਪੁੱਜਦੀ ਕਰਨ ਲਈ ਛਪਵਾਏ ਗਏ ਪਰਚਿਆਂ ਵਿੱਚ ਦੱਸਿਆ ਗਿਆ ਕਿ ਜਦੋਂ ਕੋਈ ਧਮਕੀ ਲਿਖਤੀ ਜਾਂ ਗ੍ਰਾਫਿਕ ਫਾਰਮੈਟ ਵਿੱਚ ਪ੍ਰਾਪਤ ਹੁੰਦੀ ਹੈ, ਜਿਵੇਂ ਕਿ ਹੱਥ ਲਿਖਤ ਨੋਟ ਜਾਂ ਗ੍ਰੈਫਿਟੀ ਤਾਂ ਵਸਤੂ ਨੂੰ ਨਾ ਛੂਹੋ ਅਤੇ ਨਾ ਹੀ ਬਦਲੋ। ਇਸ ਨੂੰ ਦੂਰ ਨਾ ਸੁੱਟੋ। ਜਦੋਂ ਫ਼ੋਨ ਰਾਹੀਂ ਧਮਕੀ ਮਿਲਦੀ ਹੈ ਤਾਂ ਕਾਲਰ ਅਤੇ ਧਮਕੀ ਬਾਰੇ ਵੱਧ ਤੋਂ ਵੱਧ ਜਾਣਕਾਰੀ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰੋ। ਧਮਕੀ ਪ੍ਰਾਪਤ ਹੋਣ ਦੀ ਮਿਤੀ ਅਤੇ ਸਮਾਂ ਨੋਟ ਕਰੋ, ਆਦਿ।